GOLAT/ Arsenali fiton dhe 'arratiset' në krye të Premier League, ndalet Man. City! Chelsea i shënon 4 herë Aston Villas, 'thyhet' Man. United

ANGLI - Premier League e futbollit në Angli zhvilloi të mërkurën pesë nga ndeshjet e raundit të 29-të, duele të cilat u zhvilluan në mesjavë. Tri pikë siguruan Arsenali, Chelsea, Newcastle dhe West Hami, ndërsa Man. United u mposht në udhëtim, ndërsa u ndal edhe Man. City. 'Topçinjtë' e Arsenalit përfituan dhe me 67 pikë (dhe një ndeshje më shumë) mbeten në krye të renditjes, shtatë pikë më shumë se Man. City ndjekës. Ky raund në elitën e futbollit anglez mbyllet këtë mbrëmje me ndeshjen Tottenham - Crystal Palace (21:00).

Në stadiumin 'Amex', vendasit e Brighton u mposhtën 0-1 nga Arsenali. Skuadra e  Mikel Artetas iu fal golit të Bukayo Saka në minutën e nëntë të ndeshjes për të marrë tri pikët në në ndeshje që në fund nuk prodhoi më shumë se një gol.

Në 'Etihad' Manchester City i Pep Guardiolës nuk shkoi më shumë se barazimi 2-2 kundër Nottinghamit. Semenyo shënoi golin e avantazhit për 'Qytetarët' që e mbyllën në epërsinë minimale pjesën e parë. Në nisje të fraksionit të dytë duhej Gibbs-White me një gol të mrekullueshëm për barazimin 1-1, por Man. City gjeti sërish epërsinë momentale me Rodrin në minutën e 62-të. Kur u duk se vendasit po e kontrollonin lojën, Nottinghami befasoi dhe barazoi rezultatin me golin e Anderson në minutën e 76-të. Të dyja skuadrat ndanë nga një pikë pas 90 minutave.

Në 'Villa Park' të Birminghamit, vendasit e Aston Villas u përmbysën 1-4 nga Chelsea. Tre gola për miqtë u shënua nga Joao Pedro. Aston Villa kaloi në epërsi me Douglas Luiz pas vetëm disa sekondave lojë, por miqtë përmbysën ndeshjen brenda pjesës së parë me dy golat e Joao Pedros në minutat 35 dhe 45+6. Në fraksionin e dytë Cole Palmer shënoi golin e tretë për miqtë, para se Joao Pedro në minutën e 64-t të kompletonte tripletën personale dhe golin e katërt për 'Blutë e Londrës'. Me 48 pikë Chelsea mban vendin e pestë dhe gjen fitoren pas tre ndeshjeve 'jo'.

Dramë për Manchester United në 'St. James Park'. Vendasit e Newcastle fituan 2-1 edhe pse gjithë pjesën e dytë e luajtën me një lojtar më pak pas daljes me karton të kuq të Ramsey në minutën e 45+1. Shtesa e pjesës së parë prodhoi dy gola. Fillimisht Gordon u tregua i saktë nga 11 metërshi dhe kaloi Newcastle në epërsi në minutën 45+6, por po në shtesë Casemiro mbylli pjesën e parë me rezultatin 1-1. Ndeshja më pas ishte spektakolare, por Newcastle e shënoi golin e fitores vetëm në minutën e 90-të me autor Will Osula i cili kishte vetëm pesë minuta në fushë. Përballë dy mbrojtësve rivalë, Osula lëshoi një goditje me të majtën dhe trajektorja e bukur e topit bëri që të ndalej në fundin e rrjetës.

Premier League, raundi 29-të:

E mërkurë, 4 mars 2026

Aston Villa 1-4 Chelsea

Brighton 0-1 Arsenal

Fulham 0-1 West Ham

Manchester City 2-2 Nottingham

Newcastle 2-1 Manchester United

Renditja: