Asambleja, debate mes Ramës dhe anëtarëve

TIRANË - Punimet e sotme të Asamblesë së PS kanë ngjallur debatet dhe reaksionin e disa prej anëtarëve më të rëndësishëm të saj. Sipas vendimit të kryesisë së PS që pritej të votohej sot në asamble, do të kishte lëvizje të të gjithë të deleguarve të kryesisë dhe grupeve të punës në rrethe të ndryshme të vendit. Kështu psh, Erion Braçe do të mbulojë Korçën, ndërkohë që Ben Blushi është caktuar në Elbasan. Ndriçim Hysa është hequr nga Elbasani për të mbuluar Tiranën. Fatmir Xhafaj është mandatuar të merret me zonën e Sarandës e Delvinës etj.
Por kjo ka ngjallur reagimin e anëtarëe të Asamblesë. Shpëtim Gjika, kryetar i bashkisë së Vlorës në mënyrë të revoltuar ka folur hapur në Asamble, duke i deklaruar presidiumit kryesor se vetë strukturat drejtuese në bazë nuk janë “ushtarë”.
“Po na trajtoni si ushtarë. Keni caktuar në Vlorë të paktën 5 persona që nuk janë fare nga Vlora. Po abuzoni me bazën e partisë. Ju nuk mund të promovoni figurat tuaja duke përdorur bazën e Vlorës” ishte deklarata shpërthyese e Shëptim Gjikës përpara anëtarëve të Asamblesë Kombëtare.
Një tjetër anëtar i asamblesë, Ndriçim Hysa, po ashtu u shpreh i revoltuar për ndryshimet, dhe sidomos largimin e tij nga Elbasani, për ta deleguar në qarkun e Tiranës. “Me të gjitha këto që po bëni, ia keni lënë partinë kryetarëve të partive dhe kjo nuk është e drejtë. Kjo është një skemë që nuk funksionon” mësohet të ketë thënë Hysa përpara delegatëve.
Por i menjëhershëm ka qenë edhe reagimi i kryetarit të PS Edi Rama për të shuar të gjitha debatet e brendshme. Sipas tij, partia nuk është një ndërmarrje, dhe duan të bëjnë punët që duan. Kush nuk e pranon detyrën që i ngarkon partia, e ka derën e hapur, ka qenë haptazi “kërcënimi” i Edi Ramës për anëtarët e asamblesë.
Debatet edhe pse kanë qenë disa, ishin të paorganizuara, edhe për faktin se shumica e anëtarëve të Asamblesë u gjendën të surprizuar nga lëvizjet. Një prej anëtarëve të Asamblesë që pritej të fliste, Erion Braçe, nuk ka folur, sepse kur erdhi radha e pikës që do të shpalleshin emrat se ku ishin caktuar, kjo pikë kaloi pa diskutime.

(aq/shqiptarja.com)