Në këtë automjet, bashkë me një prej personazheve më të njohur të krimit Gilmando Dani, u vra në 11 nëntorin e vitit të kaluar edhe një punonjës i shtetit, agjenti i Agjencisë së Mbikëqyrjes Policore, Muçi Shaljani. 

Do të duhet të ishte shërbëtor i ligjit, por dyshimet janë të forta që rekrutimi i tij në agjencinë ligjzbatuese është bërë me arsyen e vetme për t’i shërbyer krimit.

Gjykata e Tiranës vendosi këtë të hënë pezullimin nga detyra të drejtorit të Financës dhe Shërbimeve Mbështetëse në Agjencinë e Mbikëqyrjes Policore, Gëzim Sala, i cili lejoi punësimin e Muçi Shaljani (Sheqeri), edhe pse nuk plotësonte asnjë kush ligjor për të veshur uniformën e shtetit.  Përveç pezullimit nga detyra, me vendim gjykate Salës i ndalohet dhe dalja jashtë vendit, për akuzën e shpërdorimit të detyrës.

Shaljani u pranua si agjent në AMP vetëm 6 ditë pas kërkesës, ndërsa nga hetimi rezultoi se Gëzim Sala shkeli ligjin, pasi procedura e ndjekur për rekrutimin nuk është ligjore dhe se ai në këtë proces ka nënshkruar miratimin vetëm për anën formale të akteve dhe jo në përmbajtje. Sala ka urdhëruar punësimin pranë AMP-së të Shaljanit me urgjencë me motivacionin “pranohet me kontratë të përkohshme dhe për nevoja emergjente”. Shaljani është paguar deri ditën e atentatit nga AMP, nga 16 shtatori deri më 11 nëntor 2025, pa u paraqitur asnjë ditë të vetme në punë.

Dyshimet e prokurorisë se punësimi i Shaljanit në AMP është i sponsorizuar nga krimi i organizuar shtohen edhe nga fakti se agjentit të ri që prej fillimit të punës është vendosur detyra e vëzhgimit. Ndërkohë që drejtori Sala vijonte të ishte në detyrë dhe ciklonte çdo shkresë, madje edhe për veprime hetimore të prokurorisë, për punonjës të policisë, që pengonte hetimet që kishin nisur ndaj tij. Këto arsye e bindën prokurorinë të kërkonte masë pezullim ndaj tij deri në përfundim të hetimit.

Atentati mafioz i Rinasit që i mori jetën punonjësit të AMP-së dhe Gilmando Danit, prej disa ditësh po hetohet nga SPAK, pasi Prokuroria e Tiranës, shpalli moskompetencë. Gimando Dani dhe Muçi Shaljani (Sheqeri) u vranë me breshëri plumbash kallashnikovi nga një grup vrasësish prej 3 personash, sapo dolën nga aeroporti i Rinasit. Të dy sapo ishin kthyer nga Barcelona, ndërsa një makinë i priste te rrethi i Rinasit. Pas vrasjes së dhunshme, makinat tip “Toyota”, u largua me shpejtësi dhe u dogj në fshatin Halil. Prej ditës së ngjarjes, asgjë nuk u zbardh për autorët apo porositësit, ndërsa hetimet u përqendruan te larja e hesapeve mes grupeve kriminale.

Njoftimi i Prokurorisë së Tiranës

Prokuroria Tiranë kërkon pezullimin e drejtorit të AMP-së, shtetasit G.S., nën hetim për ‘Shpërdorim detyre’ pasi lejoi punësimin në shkelje të ligjeve të të ndjerit M.Sh.

Me kërkesë të Prokurorisë pranë Gjykatës së Shkallës së Parë të Juridiksionit të Përgjithshëm, Tiranë, u vendos caktimi i masës së sigurisë ‘Ndalim i daljes jashtë shtetit’ dhe ‘Pezullim i ushtrimit të një detyre a shërbimi publik’ për shtetasin G.S., Drejtor në Agjencinë e Mbikëqyrjes Policore Tiranë, nën hetim për kryerjen e veprës penale “Shpërdorimi i detyrës”, parashikuar nga neni 248 i Kodit Penal.

Hetimet nisën pas kallëzimit të kryer nga Agjencia e Mbikëqyrjes Policore, mbi punësimin në kundërshtim me ligjin pranë kësaj agjencie të shtetasit M.Sh., i cili humbi jetën në rrethrrotullimin e Rinasit, i qëlluar me armë zjarri së bashku me shtetasin G.D.

Nga hetimet rezultoi se shtetasi M.Sh., ishte punësuar prej afro 2 muajsh, si punonjës i AMP-së në funksion ndihmëspecialist në Drejtorinë e Forcës së Posaçme Operacionale. Prokuroria provoi se dokumenti i gjendur këtij shtetasi ishte i falsifikuar pasi nuk rezultonte që AMP ta ketë pajisur me dokument. Ky shtetas kërkoi të punësohej në AMP më 09.09.2025 dhe pranimi i tij më 15.09.2025, nëpërmjet një urdhri, rezulton haptazi në kundërshtim me ligjin “Për Agjencinë e Mbikëqyrjes Policore” dhe Vendimin e Këshillit të Ministrave Nr.532, datë 29.07.2022 “Per Miratimin e Rregullores Për Organizimin dhe Funksionimin e Agjencisë së Mbikëqyrjes Policore”.

Në këto akte ligjore dhe nënligjore përcaktohet qartë se rekrutimi i punonjësve të AMP-së bëhet nëpërmjet konkurimit, shpalljes së vendeve vakante, krijimit të komisioneve përkatëse, testimit, verifikimit përfundimtar për kualifikimin/skualifikimin e aplikantëve deri në përpilimin e kontratës, urdhrin e emërimit në detyrë dhe periudhën e provës.

Drejtori i Drejtorisë Financës dhe Shërbimeve Mbështetëse, shtetasi G.S., shprehet se procedura e ndjekur për rekrutimin e shtetasit M.Sh., nuk është ligjore dhe se ai në këtë proces ka nënshkruar miratimin vetëm për anën formale të akteve dhe jo në përmbajtje. Ndërkohë që ky shtetas ka kërkuar që ky urdhër të bëhej shpejt me motivacionin ‘pranohet me kontratë të përkohshme dhe për nevoja emergjente”.

Ky shtetas me veprimet dhe mosveprimet e tij, ka konsumuar elemente të veprës penale të “Shpërdorimi i detyrës” parashikuar nga neni 248 i K.Penal. Ai ka anashkaluar ligjin organik Nr.128/2021 “Për Agjencinë e Mbikëqyrjes Policore” dhe Rregulloren “Për Organizimin dhe Funksionimin e Agjencisë së Mbikëqyrjes Policore” e miratuar me VKM Nr.532, datë 29.07.2022, ku janë përcaktuar qartë fazat e vlerësimit të kandidaturës M. Sh., nga testimet, verifikimet përfundimtare, vlerësimi i dokumentacionit të dorëzuar nga aplikanti (asnjë prej këtyre fazave nuk është aplikuar) deri në nënshkrimin e Urdhërit të punësimit, i cili në përmbajtje të tij ka motivimin “për nevoja emergjente”.

Shtetasi M.Sh. u punësua me një procedurë të paligjshme, në një kohë shumë të shkurtër (nga data 09.09.2025 kur eshte paraqitur zyrtarisht kërkesa deri më datë 16.09.2025, që i janë lidhur marëdhëniet financiare, në total 4 ditë pune, që tregon se nuk është aplikuar asnjë prej detyrimeve ligjore të shprehura në ligjin dhe rregulloren e AMP-së. U pagua me rrogë të rregullt nga data 16.09.2025 deri ne date 11.11.2025 (data e ngjarjes në rrerotullimin e Rinasit), pa u paraqitur asnjëherë në punë, apo zhvilluar ndonjë detyrë.