TIRANË-  Ishte Durim Bami, njeriu që i ka shpëtuar një atentati me armë mbrëmjen e djeshëm, por që ende nuk është gjendur nga policia dhe prokuroria e Krujës. Bami ka qënë nën shoqërinë e kushëririt të tij Ervin Kodra, teksa lëvizte me automjet nga zona e Kamzës në drejtim të Krujës. Por teksa kanë hyrë në urën e Tapizës, ata kanë rënë në pritë duke u qëlluar me breshëri automatiku. Makina e Bamit ka marë 5 plumba automatiku, por besohet se mjeti me të cilin ai lëvizte ka qënë i blinduar dhe i ka mbrojtur mirë.

Kjo pasi plagë të lehta ka marë vetëm Ervin Kodra, ndërsa për Durim Bamin nuk ka asnjë të dhënë nëse është plagosur ose jo. Gjatë mëngjesit të sotëm dhe deri në këto momente policia ka ushtruar kontrolle në banesën e Durim Bamit dhe disa banesa të tjera në Krujë e Fushë-Krujë, por nuk është arritur të kryhet gjetja e tij. Policia dhe prokuroria e Krujës thonë se Ervin Kodra dhe kusheri i tij Durim Bami, kanë rënë në pritë pasi personat ishin pozicionuar buzë rrugës, pikërisht në ambjentet e një pike që tregton mermer.

Sapo makina e Bamit është shfaqur afër makinës ku qëndronin qitësit, ata kanë hapur zjarr në mënyrë të befasishme drejt makinës ku qëndronte Bami dhe Kodra. Sipas burimeve në vendgjarje janë gjetur dy lloj gëzhojash, automatiku dhe pistolete. Policia beson se mes autorëve dhe Durim Bamit mund të ketë pasur shkëmbim zjarri, duke sjellë dhe dështimin e atentatit për të vrarë Durim Bamin. Ky i fundit ende nuk është gjendur nga policia e Krujës. Bami është subjekti i OFL dhe njihet si person me precedent penalë dhe i dyshuar si pjesëmarës në disa ngjarje shumë të rëndë.

Ndërkohë autorët kanë arritur të djegin makinën dhe armën e krimit një automati. Emri dhe fotoja e tij u bë publik dhe mori akoma më tepër famë, në skandalin Meta-Doshi, ku sipas Doshit, Durim Bami ishte kontraktuar nga Ilir Meta për të vrarë Tom Doshin, kundrejt 500 mijë eurove.

Rendit zhvillimet sipas orarit:
Ora 11:00
Atentati ndaj Durim Bamit/ Shoqërohen në polici disa persona, mes tyre edhe i vëllai

Report Tv ka mësuar detaje të reja nga atentati ndaj Durim Bamit. Mësohet se në polici janë shoqëruar disa persona që mendohet se kanë dijeni për ngjarjen. Mes personave të shoqëruar edhë edhe Valter Bami, vëllai i tij. Ndërkohë që Durim Bami është arratisur.

Durim Bami

B.K./Shqiptarja.com

Ora 09:14
Plagosja e kushëririt të Durim Bamit, gjendet e shkrumbuar në Valias makina e autorëve (VIDEO)

Gjatë kërkimeve në terren të policise kriminale të rrethit te Krujës për të zbardhur dhe dokumentuar plagosjen e ndodhur ditën e djeshme në Tapize ku mbeti i plagosur 35 vjeçari Ervin Kodra kushëri i Durim Bamit, policia ka gjetur në fshatin Valias autoveturen që dyshohet të jetë përdorur nga autorët për të kryer plagosjen.

Autovetura është 'Volkswagen Golf 5' dhe u gjet totalisht e djegur madje nuk ka as numër shasie pasi i është fshirë. Makina është totalisht e djegur dhe brenda saj nuk janë gjetur armë apo sende të tjera.

Makina që u dogj sot në Tapizë

Kush është Durim Bami? Durim Bami nga Kruja është një tjetër emër i njohur nga drejtësia, por sidomos nga publiku dhe politika shqiptare. Ai ka qenë dënuar më parë për vjedhje me armë. Bami është i njohur për atentatin e pretenduar nga Tom Doshi. Për këtë atentat të pretenduar në dyert e Prokurorisë përfunduan të gjithë zyrtarët e lartë të shtetit. Tom Doshi, Mark Frroku dhe Durim Bami u akuzuan për kallëzim të rremë për çështjen e atentatit të pretenduar ndaj Tom Doshit dhe deputetit të PD, Mhill Fufi. Doshi akuzoi në 2015-ën ish-kryetarin e Kuvendit, Ilir Meta, se kishte porositur një atentat për ta ekzekutuar përmes Durim Bamit, kundrejt pagesës 500 mijë euro.