Për herë të parë pas një dekade, revista Vanity Fair ka publikuar listën e saj me 70 personat më të veshur në botë për vitin 2026. Mes yjeve të Hollivudit dhe emrave të njohur të muzikës pop, një nga surprizat e listës është Papa Leone XIV, i cili është vlerësuar për stilin e tij të veçantë dhe zgjedhjet e pazakonta në veshje.

Revista e vlerësoi kreun 70-vjeçar të Kishës Katolike për mënyrën se si ka sjellë një frymë të re në stilin papnor. Një nga detajet që ka tërhequr më shumë vëmendje janë atletet Nike që ai mban nën veshjen e bardhë karakteristike. Ato shfaqen shkurtimisht në një dokumentar të prodhuar nga Vatikani.

José Criales-Unzueta, korrespondent i modës në Vanity Fair dhe pjesë e ekipit që përpiloi listën, tha se imazhi i Papës kishte tërhequr vëmendjen për stilin e tij me frymë amerikane.

Sipas The Guardian, Papa i lindur në Çikago ka fituar gjithnjë e më shumë vëmendje për mënyrën se si kombinon veshjet e punuara me dorë me aksesorët vintage. Përveç atleteve, ai preferon këpucë të zeza Oxford në vend të këpucëve tradicionale të kuqe papale.

Mes aksesorëve të tij është edhe një orë zvicerane me kuarc, e cila nuk prodhohet më, ndërsa ruan gjithashtu çantën e tij të vjetër. Në qershor të vitit 2025, ai tërhoqi vëmendjen kur u shfaq në një audiencë publike në Sheshin e Shën Pjetrit me një kapelë bejsbolli të ekipit Chicago White Sox, të vendosur mbi kapelën e tij papale.

Për rastet zyrtare, Papa Leone XIV i beson stilistit italian Filippo Sorcinelli, i cili ka krijuar veshje papale edhe për paraardhësit e tij, Benediktin XVI dhe Papa Françeskun.

Papa Leone XIV është përfshirë në kategorinë “Origjinalët” të Vanity Fair, ku renditen personazhe të njohur që dallohen për zgjedhjet e tyre të veçanta dhe krijuese në veshje. Në të njëjtën kategori bëjnë pjesë edhe regjisori Spike Lee dhe këngëtaret Björk dhe Rosalía.

Ky nuk është vlerësimi i parë për stilin e Papës. Në fund të vitit 2025, ai u përfshi edhe në listën e Vogue për personat më të veshur të vitit, së bashku me A$AP Rocky dhe Bad Bunny. Ndërsa New York Times e përzgjodhi si një nga 67 personat më elegantë të vitit.