Komisioneri i BE-së për Migrim, Çështje të Brendshme dhe Shtetësi, Dimitris Avramopoulos dhe presidenti i Kosovës Hashim Thaçi kanë mbajtur një konferencë për shtyp në Bruksel pas rekomandimit pozitiv që është dhënë Kosovës për çështjen e liberalizimit të vizave.

Në fjalën e tij Avramopoulos është shprehur se Kosova i përmbush të gjitha standardet për liberalizimin e vizave pas një pune të madhe.

Pas shumë vitesh e muajsh të përpjekjeve dhe punës së madhe, Komisioni tashmë konfirmon se Kosova i ka përmbushur të gjitha standardet për liberalizimin e vizave. Tash, ne inkurajojmë Këshillin dhe Parlamentin Evropian që të lëvizin përpara me propozimin tonë. Unë vërtetë shpresoj se jemi shumë pranë një regjimi pa viza për të gjithë rajonin, i cili do të vendoset shumë shpejt. Lëvizja pa viza tani varet nga parlamenti evropian dhe këshilli. Ne e kemi bërë pjesën tonë, tani është përgjegjësi e institucioneve të tjera, por edhe në duart e institucioneve të Kosovës gjithashtu.

Dimitris Avramopoulos, komisioner

Ndërsa presidenti Thaçi ka falënderuar Komisionerin për përkushtimin e tij dhe ka bërë me dije që institucionet do të vazhdojnë progresin.

Sot ka filluar shembja e murit të fundit të izolimit. Sot është fitorja e Kosovës. Kosova i ka përmbushur të gjitha kriteret për liberalizimin e vizave. Mirënjohje për punën e vështirë që kemi bërë së bashku. Vetëm të bashkuar kemi arritur tek ky objektiv. Liberalizimi do të lehtësojë lëvizjen e njerëzve dhe do të avancojë idealet dhe vlerat tona në botë. Është evidente tanimë që Kosova është partener i sfidave të migrimit dhe sigurisë. Institucionet e pavarura do të vazhdojnë progresin.

Hashim Thaçi, president