Drejtori i Baletit Kombëtar të Kosovës, Ahmet Brahimaj, shprehet se ndihet i respektuar iu është dhënë mundësia që pas tridhjetë e katër vitesh të shfaqin dy koreografi nga repertori i tyre para publikut shqiptar në sallën e Teatrit Kombëtar të Operës dhe Baletit në Tiranë. “Pas përfundimit të luftës ne kemi dhënë shfaqje të repertorit tonë në disa qytete shqiptare si në Tiranë, Durrës, Vlorë, Apoloni, në Elbasan dhe në qytete të tjera.
Mirëpo paraqitja jonë Operën e Tiranës do të jetë për të parën herë, pasi më herët nuk na është krijuar mundësia nga udhëheqja e mëparshme e Teatrit të Operës dhe Baletit shqiptar, për të pasur paraqitje koreografike me trupën e Baletit të Kosovës përpara publikut tiranas”, ka thënë Brahimaj, duke shtuar më tej se “Ky bashkëpunim ka qenë i domosdoshëm ndërmjet dy trupave të Baletit, të Kosovës dhe Shqipërisë. Tashmë ne kemi raporte dhe mundësi të tjera me drejtorin e Operës dhe Baletit, Ilir Kerni. Ai na ka ofruar përkrahje të vazhdueshme dhe na ka thënë edhe herëve të tjera të jemi pjesë e repertorit të Operës dhe Baletit shqiptar”.
Shfaqjet që do të jepen në Tiranë
Shfaqja koreografike “Balloja e Diplomës” është një përmbledhje e pjesëve muzikore të Johan Strauss (valse, marshe, mazurka, galop, etj.) të cilat së bashku krijojnë tërësinë e një vepre. E bukura e kësaj shfaqje qëndron në freskinë dhe thjeshtësinë e saj. Në një konvikt nxënësesh, vajzash të reja, organizohet Balloja e Diplomës dhe me këtë rast ftohen të festojnë në ditën e diplomimit të tyre edhe disa kadetë të rinj të një shkolle ushtarake aty pranë.
Ajo që i fton, por edhe që i mbikëqyr njëkohësisht, është Guvernantja, ose drejtoresha e vajzave. Rolin e Guvernantes do ta interpretojë Alisa Gjoni. Guvernantja dhe vajzat e presin këtë moment me shumë emocion dhe së bashku përgatisin një program që do t’i bëjë të dyja palët të mbeten të kënaqur. Megjithëse në fillim të dyja palët janë të ndrojtura karshi njëra-tjetrës, dalëngadalë mes të rinjve fillojnë të lindin pëlqimet dhe simpatitë e para. Përjetimit të ndjenjave nuk u shpëton as Guvernantja dhe Gjenerali (në rol është Erlad Zela), një burrë në moshë që udhëheq kadetët e rinj.
Festës i vjen fundi, dhe kadetëve u duhet të kthehen në garnizon. Vajzave dhe drejtoreshës nuk u mbetet gjë tjetër veçse të shpresojnë që një gjë e tillë do të ndodh sërish, po kaq bukur dhe me ndjenjë…. Ndërsa baleti “Dasma” ka pasur disa ngjitje të suksesshme në Kosovë dhe drejtuesit e trupës së Baletit Kombëtar të Kosovës premtojnë “një sukses të ri” në Tiranë.
“Balloja e diplomës”
Koreografia: Ilir KERNI (sipas David Lichine)
Skenografia: Tonin Prendi
Kostumet: Elva Bella
Baletmaestër: Alisa Gjoni
Interpretojnë:
Solistët dhe Trupa e Baletit e TKOB
Në datat 14 dhe 15 Mars 2014, Ora 19.00
Guvernantja: Alisa Gjoni;
Gjenerali: Erald Zela; Besi Skura;
Vajza e parë: Ledia Sulaj;
Vajza e dytë: Jonida Onuzi, Odeta Dishnica; Bateristi: Endri Shkoza; Fatjon Lito;
Pas de deux “La Sylphide”: Enada Hoxha, Gerd Vaso; Erisa Gina, Dion Gjinika;
Rivale foute: Jonida Onuzi, Loreta Bala, Adela Muçollari;
Kadeti i parë: Ervis Nallbani;
Kadeti i dytë:Dion Gjinika.
“DASMA”
Balet me 1 akt
Koreografia: Mehmet BAKALLI
Interpretojnë:
Solistët dhe Trupa e Baletit të Kosovës
Në datën 16 Mars 2014, Ora 19.00
Shkrimi u publikua sot (11.03.2014) në gazetën Shqiptarja.com (print)
Redaksia Online
(d.d/shqiptarja.com)