Balla: PD e regjistruar ende me
kryetar Sali Berishën

TIRANE-Përveç Kodit Zgjedhor për socialistët duhet ndryshuar dhe ligji i partive politike, duke vendosur penalizime më të forta për subjektet jo korrekte. Si në rastin e PD-së që sipas Taulant Ballës në gjykatë nuk ka kryetar Lulzim Bashën, por Sali Berishën.

Gjatë një forumi të Shoqërisë Civile, bashkë kryetari socialist i Reformës zgjedhore është shprehur se pavarësisht se jemi në prag zgjedhjes, ka gati mbi 100 parti, ku shumë syresh figurojnë në emër te ish-kryetareve ku disa dhe kanë vdekur.

Edhe Partia Demokratike, forca politike e dyta më e madhe në Shqipëri, tha Balla, rezulton ende e regjistruar në emër të Berishës si kryetarë.

“Reforma zgjedhore është ndryshimi i ligjit të partive. Ne jemi fokusuar vetëm tek financat, por transparenca ka dhe aspekte të tjera. Nga mbi 100 parti, rreth 20 duhet të ishin çregjistruar pasi kryetarët kanë vdekur dhe nuk kanë bërë ndryshim. Partia e dytë në Shqipëri, PD, është akoma e regjistruar në emër të Berishës si kryetar”, tha Balla.

Listat e Hapura
Po kështu Balla u shpreh kundër listave të hapura. Kjo do të penalizonte tha ai në radhë të parë, gratë.
“Nëse aplikohen listat e hapura, fleta e votimit do të ishte si një libër 66 faqe. Po kështu do të pnealizonte gratë. Nëse aplikohen nuk do të ketë më shumë se 3 gra.”

Kurse lidhur me numërimin elektronike, Balla theksoi se; “Unë dhe Petrit Vasili nuk jemi kundër numërimit elektronik, por këtë ma lini ta diskutoj me kolegët në komision”.

Kreu i KQZ, Dena Biba u shpreh skeptik për listat e hapura.
“Jam shprehur skeptik për listat e hapura. Në rastet e listave të shqyera, sërish do kishim prezencë personazhesh jo aq pozitive. Njerëz me lekë dhe pushtet rajonal do përplaseshin edhe brenda listës”.

Nga ana e tij, Petrit Vasili u shpreh se partitë politikë kanë vështirësi teknike, por kjo zgjidhet.
“Partitë nuk janë sterile. Kanë sëmundje foshnjarake që duhet të kishin kaluar, por ama kanë zgjidhje”, tha Vasili.

Dekriminalizimi
I ndalur tek Dekriminalizimi, Biba tha se zor se mund të ketë konstituim të parlamentit në kohë se zor se mund të kalohen në sitë 7 mijë kandidatë.
“KQZ nuk ka kapacitete”, tha Biba.

Redaksia Online
(d.b/B.K/Shqiptarja.com)

TAG:
• kqz