Basha: Miting madhështor, mjerë kush e sheh si shenjë dobësie...Ndizini dritat dhe mposhteni errësirën

Lideri demokrat Lulzim Basha e quajti miting tubimin e sotëm para kryeministrisë, duke thënë se askush nuk duhet ta shohë si shenjë dobësie. Basha tha zgjidhja politike mund të vijë vetëm me largimin e kryeministrit Edi Rama, teksa u kërkoi simpatizantëve që të luten bashkë me të që kundërshtari të arsyetojë.

"Ky miting madhështor është mesazhi i popullit evropian të Shqipërisë. Ky mesazh është shansi për zgjidhjen politike të krizës. Mjerë kush e lexon si shenjë dobësie, pasi ne jemi më të fortë se kurrë.  Liri a vdekje! Demokraci a vdekje! Le të jetë kjo mbrëmje preludi fatlum i zgjidhjes së kësaj krize, përmes diktatit të normave dhe parimeve të Evropës. Pa asnjë kompromis për parimet dhe normat euroatlantike. Le të jetë preludi i zgjidhjes politike për t'i hapur rrugën Shqipërisë si e gjithë Evropa. Le ti lutemi Zotit, se arsyeja e njerëzve të arsyeshëm edhe në kampin kundërshtar do t'i mbivendoset verbimit të syve të atij që është kapur peng nga krimi në sofrën e qeverisë dhe sundon me krimin.

Por le t'i themi po kështu se ora po troket tik-tak tik-tak dhe se çdo ëndërr për të sunduar si despot lindor popullin perëndimor të Shqipërisë, çdo ëndërr për të imponuar me krimin zgjedhje moniste dhe çdo përpjekke për të mos u larguar por për të vijuar të qeverisë me krimin, do të marrë përgjigjen e merituar nga ky shesh.

Marshim me dritat e celularëve, ndizini dritat, mposhteni errësirën, e duam Shqipërinë si gjithë Evropa. Është madhështore kjo pamje, është madhështor mesazhi i popullit. Asnjë hap pas, më ndiqni në marshimin me dritat ndezur drejt Kuvendit", tha Basha.

Lajmi kryesor:

Vetëm 2 orë e gjysmë protestë, ndërkombëtarët 'çarmatosin' opozitën! 31 maji tubim 'anti' fushatë /Video

G.M./r.k./Shqiptarja.com

TAG:
• edi rama
• lulzim basha
• tryeze dialogu
• protesta e 25 majit