Kryetari i Partisë Demokratike Lulzim Basha zhvilloi takime elektorale në Pukë dhe Dajç. Basha tha se dy aleatët në qeverisje Rama-Meta janë në panikun e humbjes së zgjedhjeve vendore e në këto kushte sipas tij, kanë nisur presionin ndaj votuesve dhe përpjekjet për manipulimin dhe blerjen e votave. 
 
“Rama-Meta dhe makineria e tyre s’kanë lënë gjë pa bërë, që të mpijnë, të lodhin padurimin tuaj, vendosmërinë tuaj për të folur me votë në 21 qershor. Nuk kanë lënë gur pa lëvizur, me shantazhe, me sondazhe, me pazare, me kërcënime, me diversione. Kanë bërë gjithçka në këto 6 javë të fushatës por nuk ia kanë dalë dot. Nuk ia kanë dalë dot as ta trembin, as të na kërcënojnë, as ta ndalin vullnetin tuaj”, - u shpreh Basha.
 
Zoti Basha kërkoi votën masive të shqiptarëve kundër mashtrimeve të qeverisë Rama-Meta, kundër shpërfilljes që sipas tij u ka rezervuar kjo qeveri në çdo nivel dhe hap të pushtetit.
 
“Erdhën në pushtet, rritën taksat kur kishin premtuar uljen e tyre, rritën çmimin e energjisë, kur kishin premtuar uljen e tij, rritën kërbaçin mbi kokën e popullit dhe tani i gënjen mendja se kur në fakt bënë të kundërtën e asaj për të cilën ishin votuar, se mund të injorojnë votën popullore të 21 qershorit. U them sot nga Puka se vota e popullit është ligj dhe ligji do të zbatohet menjëherë, për uljen e taksave, për uljen e çmimit të energjisë, për faljen e kamatë-vonesave. Ky është ligji që ju ftoj ta votojmë dhe vulosim së bashku në 21 qershor” - theksoi zoti Basha.
 
Kryetari i Partisë Demokratike ftoi shqiptarët të votojnë në 21 qershor ofertën e PD për uljen e çmimit të energjisë me 25%, për faljen e kamatë-vonesave, për uljen e taksave në nivelin më të ulët në Ballkan, për rritjen e rrogave dhe pensioneve, për futjen në  listën e ndihmës ekonomike të gjithë atyre të hequrve  me të padrejtë dhe çdo kujt që e meriton.
 
“Me votën e 21 qershorit për PD, ne nuk do të presim por do të kërkojmë e do të çojmë deri në fund betejën tonë, deri në fitore, për uljen e çmimit të energjisë me 25% dhe faljen e kamatë-vonesave, për uljen e taksave dhe uljen e çmimit të naftës, për rritjen e rrogave dhe pensioneve, për rikthimin në listën e ndihmës ekonomike të të gjithë atyre që u hoqën me të padrejtë dhe çdokujt tjetër që ka nevojë, për trefishimin e buxhetit në ndihmë të bujqësisë e blegtorisë. Fitore, fitore, fitore!”, - përfundoi lideri i opozitës.
 
Redaksia Online
(Gre.M/Shqiptarja.com)