Bashkëpunimi ekonomik me Marokun, Meta: Finalizim të marrëveshjeve në pritje

Konkretizimi i marrëdhënieve mes Shqipërisë dhe Marokut, duhet të fillojë me finalizimin e menjëhershëm të tre marrëveshjeve në pritje për lehtësimin e regjimit të vizave, eliminimin e taksimit të dyfishtë dhe për nxitjen dhe mbrojtjen e investimeve.Kjo u theksua gjatë takimit që Kryeparlamentari Ilir Meta zhvilloi sot me Ministrin e Punëve të Jashtme të Marokut, Salaheddine Mezouar, në kuadër të vizitës zyrtare në Marok.

Për nënshkrimin e këtyre marrëveshjeve, u theksua se dy parlamentet kanë rënë dakord t'i mbështesin qeveritë respektive për thellimin e kuadrit ligjor bilateral, proces që duhet të përshpejtohet gjatë muajve në vazhdim. Edhe Ministri Mezouar tha se marrëveshjet në proces duhen finalizuar sa më shpejt me qëllim hapjen e një kapitulli të ri bashkëpunimi mes dy vendeve ndërsa shprehu mirënjohjen për qëndrimin e qartë të Shqipërisë në mbështetje të ruajtjes së integritetit territorial të Mbretërisë së Marokut, duke e cilësuar këtë si një kontribut për stabilitetin rajonal të zonës së Saharasë.

Kryetari Meta dhe Ministri Mezouar ranë dakord për intensifikimin e kontakteve në planin ndërkombëtar në kuadër të OKB-së, Organizatës për Bashkëpunim Islamik, OSBE-së, Unionit për Mesdheun si dhe në kuadër të NATO-s dhe Bashkimit Evropian, duke shprehur bindjen se Shqipëria dhe Maroku ndajnë përqasje të ngjashme mbi luftën ndaj terrorizmit, sigurisë dhe forcimit të paqes në botë.

Duke shprehur mirëkuptimin për ndjeshmëritë e brendshme të vendit mik, Meta ripërsëriti kërkesën e Shqipërisë për njohjen e pavarësisë së Kosovës nga Mbretëria e Marokut, si një realitet të pakthyeshëm që njihet prej 110 shteteve anëtare të OKB-së.

ATSH
 

TAG:
• OSBE