BE kërkon vazhdimin e bisedimeve, SHBA përshendet Nikoliçin

Bashkimi Evropian kërkon vazhdimin e bisedimeve mes Prishtinës dhe Beogradit menjëherë pas inaugurimit të Presidentit të Serbisë dhe krijimit të Qeverisë atje.
Zëdhënësja e Përfaqësueses së Lartë të BE’së, Maja Kocijancic, ka paralajmëruar konsultime mes palëve dialoguse. Sipas saj pas konsultave pritet të merret vesh më shumë edhe për bisedimet rreth Veriut të Kosovës. Me gjithë paqartësitë e krijuara rreth dialogut teknik mes Kosovës dhe Serbisë, zyrtarët në Bruksel janë shprehur të sigurt për vazhdim të dialogut. 

Për zyrtarët e BE-së, as mocioni i fundit i Kuvendit të Kosovës që kushtëzon dialogun me zbardhjen e fatit të personave të zhdukur dhe as ardhja në pushtet e ish-radikalit serb, Tomislav Nikolic nuk duket se paraqesin pengesa për vazhdimin e dialogut, të nisur një vit më parë.

Ndërkaq, Shtetet e Bashkuara kanë përshëndetur orientimin evropian të presidentit të zgjedhur të Serbisë, Tomislav Nikoliç, duke e inkurajuar që të bashkëpunojë me qeverinë e ardhshme. 

Sipas qeverisë amerikane, fokus i tij duhet të jetë stabiliteti rajonal dhe marrëdhëniet konstruktive me Kosovën. Këto komente i ka bërë zëdhënësja e Departamentit të Shtetit, Victoria Nuland. Ndonëse mediat dhe njohësit e zhvillimeve në Ballkan e kanë quajtur ultranacionalist, analistët amerikanë kanë vërejtur se Nikoliç në retorikën e tij gjatë fushatës nuk e ka vënë Kosovën si prioritet. 

/rg/shqiptarja.com/