BE-Shqipëri, Opozita tenton të
bllokojë deklaratën e përbashkët

TIRANE- Partia Demokratike tenton të bllokoi miratimin e deklaratës së përbashkët ndërmjet BE-së dhe Shqipërisë. Në ditën e dytë të takimit përfaqësuesit e opozitës kërkuan disa herë kohë për të arritur në një konkluzion për të miratuar një deklaratë të përbashkët por në përfundim ata u tërhoqën nga votimi duke e miratuar pjesërisht deklaratën. Sipas njoftimit të bërë nga zyra e shtypit e Partisë Socialiste bëhet me dije se deklarata e përbashkët u miratua pas një debati ndërmjet palëve. Bashkëkryetari i Komitetit zoti Eduard Kukan dhe Sekretariati i Parlamentit Europian kishin përgatitur një deklaratë finale për miratim nga anëtarët e Komitetit.

Ne kohën e diskutimit të kësaj deklarate, përfaqësuesit e PD kërkuan më shumë kohë në dispozicion, duke shtyrë dhe orarin e përfundimit zyrtar të takimit. Megjithëse nuk ishte e parashikuar në procedurë dy bashkëkryetarët Eduard Kukan dhe Taulant Balla e miratuan këtë kërkesë. Pas rifillimit të punimeve deputetët e PD përmes Aldo Bumçit paraqitën një tekst pothuajse të ndryshuar tërësisht nga teksti fillestar i propozuar nga Parlamenti Europian.

Përsëri edhe ky propozim u pranua nga përfaqësuesit e Partisë Socialiste dhe nga bashkëkryetarët Kukan dhe Balla. Pas diskutimeve të gjata u arrit të miratohet pjesërisht deklarata e përbashkët pasi 8 propozime të PD u lanë jashtë ku në to përfshiheshin të gjitha ankesat e demokratëve ndaj qeverisë që nga Zana Xhuka, Presidenti, AMA, Nëpunësi civil e deri tek plotësimi i anëtarëve të KQZ.

Akuzat
Deputeti i Partisë Socialiste, Taulant Balla theksoi dje në një postim në faqen e tij në “facebook” se deputetët e PD-së ishin pro votimit të deklaratës së përbashkët por ata ndryshuan qëndrim pasi kishin marrë nj urdhër nga ana e ish-kryeministrit Berisha. Konkretisht Balla shkruan se: “jo pa qëllim falënderove edhe deputetët e opozitës me të cilët ndamë të njëjtin qëndrim për rëndësinë e miratimit të deklaratës, deri në momentin kur nga Tirana erdhi e-maili që rrëzoi tërësisht draftin e propozuar nga Bashkë-Kryetari i Komitetit zoti Eduard Kuka dhe Sekretari i Parlamentit. Nga deputetët e Partisë Demokratike u informua se e-mail erdhi nga vetë Sali Berisha.

Mirëkuptuam kolegët e Partisë demokratike për situatën e vështirë në të cilën u vendosën”, theksoi Balla në postimin e tij në “facebook”. Nga ana e saj PD hodhi akuza për mazhoracnë se ndikoi në mos miratimin e tetë pikave të PD-së në deklaratën e përbashkët. Konkretisht këto tetë pika kishin të bënin me të gjitha ankesat e PD-së që kur doli në opozitë. Konkretisht në të akuzohej qeveria për zgjedhjet në Korçë, shkarkimin e Zana Xhukës, zbatimin e vendimeve të Gjykatës Kushtetuese, uzurpimin e kompetencave të Presidentit, tërheqjen e mazhorancës nga nisma për të shkarkuar Endir Bushatin. Por vendosja e këtyre klauzolave nga ana e PD-së solli edhe një tentativë të tyre për të mos pasur një deklaratë të përbashkët ndërmjet BE-së dhe Shqipërisë dhe për këtë, marrëveshja u miratua pjesërisht.

Shkrimi u publikua sot (14.03.2014) në gazetën Shqiptarja.com (print)

Redaksia Online
(d.d/shqiptarja.com)

TAG:
• kqz