Belgjika fiton me 7 gola, Skocia e Austria pas 28 vitesh në fazën finale! Zvicra barazon në Prishtinë, verdiktet e kualifikueseve të Kupës së Botës 2026

Pas përfundimit të pjesës së parë në Prishtinë, një gazetar zviceran u afrua te gazetarët e KOHËS dhe i pyeti ata se pse shikuesit po fërshëllenin sa herë që Granit Xhaka e kishte topin. 

Pasi iu shpjegua që fishkëllimat kishin të bënin me një deklaratë të Xhakës për vendimin e Leon Avdullahut dhe Albian Hajdarit për të përfaqësuar Kosovën, gazetari zviceran e kishte të qartë dhe ia tha këtë kolegut të tij në tribunën e gazetarëve në “Fadil Vokrri”.

Gazetari ishte i “Blick”, pikërisht i mediumit të fuqishëm zviceran për të cilin Xhaka e dha deklaratën që i solli fishkëllima të vazhdueshme në Prishtinë, në “shtëpinë e tij”.

Deklarata ishte dhënë në fillim të javës së kaluar, enda pa iu bashkuar Xhaka përfaqësueses së Zvicrës dhe pas paraqitjes të shkëlqyer me Sunderlandin kundër Arsenalit.  

Ekipi i “Blick” e kishte vizituar Xhakën në shtëpinë e familjes së tij në Basel. Gjatë intervistës, Xhaka ishte pyetur nëse dhemb “largimi i Avdullahut dhe Hajdarit nga Federata e Futbollit e Zvicrës”.

33-vjeçari fillimisht foli për cilësinë e dy lojtarëve.

“Lojtarë me kualitetet e tyre janë përfundimisht diçka që nuk dëshiron të heqësh dorë. Nga perspektiva e tyre, çështja është të jenë në gjendje të vlerësojnë statusin e tyre”, kishte thënë fillimisht Xhaka, që kishte vazhduar të flas për dy lojtarët.

“A do t’ia dilnin të siguronin një pozitë të rregullt startuese te përfaqësuesja e Zvicrës në tri apo katër vjetët e ardhshme? Do ta vija në dyshim këtë, duke marrë për bazë se kush nuk po luan për ne momentalisht, por është më përpara në karrierën e tyre. Ardon Jashari ishte me ne për tri vjet dhe ka bërë katër paraqitje. 

A është Leoni më përpara se Ardoni? Nuk mendoj kështu. Por ai është një djalë i mirë, përndryshe nuk do të luante çdo ndeshje për Hoffenheimin. Ndoshta i ka munguar pak durimi në lidhje me Zvicrën. Por në fund të fundit është vendim i tyre që të luajnë për Kosovën, që tani po luan në nivel shumë të lartë”, kishte shtuar Xhaka. Jashari është pjesë e Milanit dhe luan në pozitë të ngjashme me Avdullahun.

Jo të gjitha mediat në Kosovë, e sidomos faqet e ndryshme në rrjete sociale, e interpretuan drejt e saktë deklaratën e Xhakës. Jo të gjithë e përmendën faktin se Xhaka foli për kualitetet e Avdullahut dhe Hajdarit dhe deklaratën që Kosova po luante në nivel shumë të lartë.

Për këtë deklaratë të Xhakës u pyet edhe Hajdari në konferencë për shtyp para ndeshjes. Edhe deklarata e tij u shtrembërua. U shkrua se “vendimi për të luajtur për Kosovën u mor me zemër”, duke e bërë edhe më emocionale gjithë çështjen. E në fakt Hajdari nuk dëgjohet në konferencë duke përmendur “zemrën” kur pyetet për deklaratën e Xhakës.

Të mërkurën në mëngjes mediat kryesore në Zvicër i kishin shkrimet për “fishkëllimat ndaj Xhakës”. Ato jo rrallë e kanë kritikuar Xhakën, ndër të tjera për veprimet e tij në ndeshjet me Serbinë, që i bënë krenarë gjithë shqiptarët, por edhe për “ndeshjet vëllazërore” me Kosovën.

Kosova e kishte siguruar fazën play-off për Kupën e Botës 2026, teksa i duhej të fitonte 6-0 kundër Zvicrës për t'i marrë kreun e grupit. Polemika për fërshëllimat kundër Granit Xhakës në Prishtinë.

Për Grupin B kualifikues të Kupës së Botës 2026, Kosova dhe Zvicra barazuan 1-1 në Prishtinë. Paçka se shiu ishte shoqërues për më të shumtën e ndeshjes, në "Fadil Vokrri" djemtë e Franco Fodës i dhanë një mësim futbolli helvetëve. Miqtë kaluan të parët në epërsi me golin e Vargas në fillim të pjesës së dytë (47'), kjo pas një gabimi të prapavijës Dardane.

Megjithatë, Kosova reagoi dhe kontrolloi fraksionin e dytë. Supergoli i Florent Muslisë në minutën e 74-t vendosi ekuilibrat, ndërsa fërshëllima kishte për Granit Xhakën.

Kapiteni i Zvicrës doli nga fusha në minutën e 75-të mes kundërshtive dhe duartrokitjeve, ndërsa pas ndeshjes tha se nuk e priste një reagim të tillë në shtëpi.

“Jam definitivisht i befasuar, është gjëja e fundit që kam pritur, posaçërisht këtu në shtëpi. Të them të drejtën, kjo më dhemb, por duhet ta pranoj dhe të përqendrohem te futbolli”, u shpreh Xhaka.

Në fund, Zvicra me 14 pikë mban kreun e Grupit B, ndërsa Kosova si e dyta shkon në play-off.