Serbia ditë zie për terroristët, Rama: E papranueshme, po i fryn zjarrit të një konflikti të armatosur! Aleatët të veprojnë sot, nesër vonë! Prishtina asnjë hap pa ndërkombëtarët

TIRANË- Sinjal të keq e ka cilësuar kryeministri Edi Rama, vendimin e qeverisë së Serbisë për të shpallur 27 shtatorin ditë zie për 3 terroristët serbët të vrarë nga policia e Kosovës, pasi këta të fundit vranë efektivin Afrim Bunjaku.

Në një shënim në rrjetet sociale, kreu i qeverisë shqiptare thotë se në vend që Serbia të hapte një hetim serioz për anëtarët e këtij grupi kriminal, si dhe për lidhjet e tyre me trafikun e armëve, Beogradi më këtë shpallje zie po i fryn si asnjëherë më parë qysh prej vitit 1999, zjarrit të një konflikti të armatosur. Për kryeministrin Rama, kjo është jo vetëm e pajustifikueshme dhe e papranueshme, por e dënueshme me të gjithë forcën e fjalës e të instrumentave në dispozicion të bashkësisë euro-atlantike!

‘Zija e shpallur zyrtarisht në Beograd për pjesëtarët e grupit të armatosur që u asgjësuan nga forcat e sigurisë së Republikës së Kosovës, pasi nga ai grup iu mor jeta një efektivi të policisë është sinjali më i keq që Serbia mund t’i jepte rajonit dhe komunitetit euro-atlantik! Në ndërkohën që duhet të kishte hapur një hetim serioz për anëtarët e atij grupi kriminal, lidhjet e tyre me trafikantët e armëve dhe me të tjerë individë apo entitete, në Serbi apo gjetkë, potencialisht të angazhuara në krijimin e një lëvizjeje të armatosur në Veriun e Kosovës, Beogradi me këtë shpallje zije që nuk ka asnjë lidhje me shekullin XXI, i fryn si asnjëherë më parë qysh prej vitit 1999, zjarrit të një konflikti të armatosur! Kjo është jo vetëm e pajustifikueshme dhe e papranueshme, por e dënueshme me të gjithë forcën e fjalës e të instrumentave në dispozicion të bashkësisë euro-atlantike!'- shkruan Rama.

LEXO EDHE:
Zgjedhjet në SHBA/ Trump shton sulmet personale ndaj kandidatit të pavarur: Familja e Kennedy Jr, një tufë të çmendurish

Rama bën thirrje që Serbia tashmë duhet ta ndajë qartë dhe presë mendjen nëse do të jetë me Europën e shekullit të XXI apo me hijen e vetvetes të fundit të shekullit të XX. Sipas kryeministrit Rama, ky është momenti kur BE dhe SHBA duhet të ndajnë qartë e prerë mendjen nëse do t’i japin fund përshkallëzimit të situatës në Kosovë.

'Ky është momenti që Serbia duhet ta ndajë qartë dhe prerë mendjen nëse do të jetë me Europën dhe botën demokratike të shekullit XXI apo me hijen e vetvetes së fundshekullit XX; me vlerat dhe parimet e Bashkimit Europian e të komunitetit euro-atlantik apo me fantazmat dhe me krimet e të shkuarës së saj të palavdishme të viteve ‘90; me të nesërmen europiane të fëmijëve të saj të pafajshëm apo me të djeshmen e fajshme të nacionalizmit vrasës e vetëvrasës! Ky është momenti kur Bashkimi Europian dhe Shtetet e Bashkuara duhet ta ndajnë qartë e prerë mendjen nëse do ta ngrenë në nivelin më të lartë alarmin demokratik për ta ndalur përshkallëzimin e konfliktit në Veriun e Kosovës, i cili ka hyrë në fazën e vet më të rrezikshme qysh prej vitit 1999 apo do të vazhdojnë t’i mbajnë Dialogun për Normalizim dhe angazhimin e KFOR-it në të njëjtin nivel krejt të pamjaftueshëm tanimë! Kjo e dyta sot është krejt e pakëshillueshme, por nesër mund të bëhet krejt e pajustifikueshme, sepse nesër mund të jetë vonë edhe për të parën!'- shkruan Rama.

Në fund të fjalës së tij, Rama ka një apel për aleatët strategjikë të Ballkanit Perëndimor, duke i kërkuar që të veprojnë tani dhe mos ta lënë për nesër. Po ashtu sipas Ramës ky është momenti kur edhe Kosova duhet të reflektojë shumë seriozisht dhe të ndajë mendjen qartë e prerë nëse do vazhdojë pa aleatët, apo do veprojë në mirëkuptim me ta.

'Prandaj apeli i Shqipërisë për miqtë e mëdhenj e aleatët strategjikë të Ballkanit Perëndimor është: Veprimin e sotëm, mos e lini për nesër! Ky është momenti kur edhe Kosova duhet të reflektojë shumë seriozisht dhe të ndajë mendjen qartë e prerë, nëse do të vazhdojë në kursin e veprimit të shkëputur nga miqtë e saj të pazëvendësueshëm dhe aleatët e saj të padiskutueshëm apo do të veprojë në harmoni e mirëkuptim me komunitetin euro-atlantik, për të arritur qëllimin më madhor në histori pas fitores së luftës e shpalljes së pavarësisë, njohjen përfundimtare si shtet anëtar i këtij komuniteti! Të gjitha rrugët e tjera përveç kësaj të dytës janë rrugë iluzionesh me përfundime të dhimbshme, të cilat e largojnë Kosovën nga qëllimi madhor, e zbrazin atë nga shpirti i ardhmërisë dhe e kthejnë në mënyrën më absurde peng të paqes në mes të Europës, pasi ka dalë fitimtare nga lufta për t’u bërë një vend i lirë europian.’- shkruan Rama.

Një pjesëtar i policisë së Kosovës mbeti i vrarë (24 shtator) ndërsa 3 të tjerë u plagosën gjatë përleshjeve me një grup serbësh prej 30 personash të armatosur në veri të Kosovës, në fshatin Banjskë të Zveçanit. Policia arriti të rimerrte kontrollin në orët e mbrëmjes së 24 shtatorit, ndërsa vrau 3 sulmues, dhe arrestoi 6 të tjerë, 2 prej tyre të plagosur. Kosova akuzon Serbinë se ka financuar grupin kriminal. Vuçiç e mohon e thotë se shkaktar është Albin Kurti.

M.Q./S.G/Shqiptarja.com

TAG:
• edi rama
• vritet polici ne kosove
• tensione ne veri te kosoves
• serbi
• BE
• SHBA