Berisha: Do nisim fazën e re të revolucionit, të fitojmë zgjedhjet! Neza e Duçka iu vinin gjoba biznesmenëve, hapën në Tiranë biznesin e ‘black listimit’

Ditën e enjte do të mbahet sërish protestë para parlamentit. Protesta do të mbahet njëkohësisht në kohën kur do të zhvillohet edhe seanca plenare, njëjtë si dy herët e kaluara. Deputeti Flamur Noka thotë se protesta u vendos që të mbahet në mbledhjen e Këshillit Kombëtar.

Kjo protestë do të mbahet teksa e gjithë vëmendja është e zhvendosur te protesta e 3 marsit.

“Mbledhja e Këshillit Kombëtar të Partisë Demokratike vendosi: Protestat do të vazhdojnë! Thirrje qytetarëve për protestën e radhës ditën e Enjte, para Parlamentit, ora 10:00! Liri pa fjalë të lirë nuk ka! Edi Rama nuk ka shans t'i mbyllë gojën opozitës”, shkruan Noka.

Ish-kryeministri Sali Berisha thotë se Agron Neza dhe Dorian Duçka u vinin gjoba biznesmenëve në Tiranë. Sipas Berishës, ata shkonin iu uleshin në tavolinë biznesmenëve që kishin para dhe u kërkonin lekë për t’iu hequr non gratën në SHBA.

Ndaj dhe hymë në një fazë të re, në një fazë në të cilën ne do të arrijmë fitore vendimtare ndaj këtij regjimi. Nuk duhet të dekurajohemi, nuk duhet të pranojnë për asnjë rast të tërhiqemi. Mendoni për një moment, çfarë diktature përjetojnë sot qytetarët shqiptarë nga mashtrimi dhe relativizmi. Mendojeni pak, për ti thënë vetes se sa herë, sa jetike është që çdo demokrat të ulet me çdo shqiptare e çdo shqiptar.

Mediat sot për shkak të kontrollit të pamëshirë të qeverisë mbi pronarët, ushtrojnë atë të cilën dikur i pavdekshmi, Papa Benedikti i 16 e quajti diktatura e realivizmit.  A është në hetim Edi Rama, apo nuk është në hetim Edi Rama? Po ju jap vetëm këtë shembull shqiptarëve, në një kohë kur vendimi i gjykatës Amerikane thotë se është në hetim, e keni vënë re ju se në shumicën e ekraneve, është në hetim, nuk është në hetim.

Mora një shembull që është në hetim me gjithçka të tij, e që ai hetim do ta ndjekë gjithë jetën e që ai hetim do të zhvillohet edhe në Shqipëri dhe nuk ka ku të shkojë, sepse këta mafiozë hapën në Tiranë biznesin e ‘black listimit’. A e dini ju që McGonigal me asistentët e tij mafiozë, Dorian Duçka dhe Agron Neza kalonin nga restoranti në restorant dhe kapnin biznesmenët nëpër tavolina, hajde pak njëherë se më duket ke diçka. Absolutisht, është e vërtetë. Gjer në këtë shkallë degradoi. Por në cilin vend të botës nuk ndiqen këta, përveç se në shtetin mafioz të Edi Ramës, këta gjobëvënës të pafytyrë. Absolutisht. Nuk ishin vetëm ata, nuk ishin pa mbështetje ata.

Ish-kryeministri Sali Berisha thotë se Dorian Buçka kishte mbështetjen edhe ambasadorëve. Berisha thotë se Kim i ka dhënë herë pas here like Duçkës në Instagram. Në mbledhjen e Këshillit Kombëtar Berisha tha se Kim duhet të shpjegojë përse i ka bërë ‘simpati’ Doran Duçkës.

“Absolutisht, nuk ishin vetëm pa mbështetje. Çfarë e shtynte Kim t’i bënte simpati në instagram Dorian Duçkës. A mund të na e thotë pak zonja. Në vend se të njoftonte vendin e vet, se këta mafiozë po shkelmojnë çdo gjë, Duçka u nxirrte ndjekësen VIP. ”, tha Berisha.

Ndonëse protestat e organizuara nga Sali Berisha, nuk sollën asnjë revolucion ashtu siç ai pati premtuar, ish-kryeministri tha sot në mbledhjen e Këshillit Kombëtar se tashmë do të futen në ‘fazën’ e dytë të revolucionit. Mesa duket për Berishën faza e parë e revolucionit qenka ‘realizuar me sukses’ dhe tashmë do të futen në një fazë tjetër që është ajo e fitimit të zgjedhjeve.

"Ju do të dëgjoni nga shumë bashkëbisedues tuaj të flasin për revolucionin si një diçka traumatike, por në fakt nuk ka gjë më të shenjtë për këtë shoqëri sot, sesa revolucioni. Sepse duhet të shpëtojë kjo shoqëri. A nuk janë përzënë nga Shqipëria nga viti 2014-2022, 937 mijë qytetarëve vetën në hapësirën e BE-së. A nuk janë përzënë. Asnjë lloj lufte nuk mund të ishte kaq shpresëvrasëse tek shqiptarët sa ky regjim. Pra është jetike për ne.

Së pari të shtrojmë këto pyetje vetes tonë, së dyti të hapim një debat me çdo shqiptar. Nuk e kemi për vete ne këtë, nuk e kemi për pushtetin tonë. Jo kjo është për çdo shqiptar, kjo është për Shqipërinë, kjo është për ti dalë zot këtij vendi dhe shpëtuar nga kjo katastrofë në të cilën po rrokulliset me shpejtësi, sa asnjë vend tjetër i planetit. Pa luftë civile, pa ndonjë luftë tjetër, vetëm një shpresëvrasës nga mëngjesi deri në darkë.

Ne jemi në revolucion, por tani kërkohet një fazë tjetër. Ne hymë në një fazë në të cilën nga mëngjesi deri në darkë duhet të punojmë për fitoren e zgjedhjeve lokale. Kandidatët tanë duket të kenë nga strukturat, mbështetjen më maksimale që mund tu japim. Kandidatët tanë, duhet të shumëfishojnë ccdo përpjekje për rezultatet më të shkëlqyera, por kjo duhet të shkojë paralel me të gjitha format, qëndresën dhe veprimtaritë e revolucionit tonë", tha Berisha.