Berisha në arrest shtëpie nga dritarja u flet militantëve, Balla: E papranueshme! Afera "Partizani", korrupsion i pastër

Sali Berisha po shkel në mënyrë të hapur masën e “arrestit në shtëpi” të vendosur nga GJKKO dhe për këtë, policia do të zbatojë procedurat si për çdo rast tjetër të shkeljes së Kodit të Procedurës Penale.

Ministri i Brendshëm Taulant Balla e quajti të papranueshme shkeljen e vendimit të GJKKO-së që Sali Berisha bën duke mbajtur fjalim nga ballkoni, a dritarja para milintantëve të cilët mblidhen poshtë në rrugën “Mustafa Matohiti” ndërsa është në ‘arrest shtëpie’

Balla gjatë gjithë fjalës së tij nuk e përmendi emrin e Sali Berishës por iu drejtua me zotëria.

Kam dëgjuar shumë intepretime nga mediat për mënyrën e zbatimit të arrestit në shtëpi. Kodi i Procedurës Penale thotë se ke të gjitha ndalimet që ke gjatë arrestit me burg. Nuk e kam shkruar unë as zotëria por e kam votuar dhe unë dhe zotëria. Këtu është ndarja e dy botëve. Sa e respekton ligjin. Është e papranueshme por megjithatë i takon institucioneve të tjera të komentojnë. Nuk kam pasur kontakt me policinë për detyrën që ka, që shtetasin në fjalë ta trajtojë si çdo qytetar tjetër. Policia ka urdhërin e prokurorëve si e zbaton kontrollin në zbatimin e masës. Policia referon te prokurorët çdo gjë për zbatimin e masës"

I pyetur për hetimet ndaj Berishës, Balla edhe si denoncues i çështjes në SPAK, kur ishte deputet, e cilësoi çështjen Partizani si aferë të pastër korrupsioni. 

Pavarësisht se në rastin e personi që flisni është një kallëzim i bërë nga ana ime në cilësinë e deputetit apo të një qytetari të njohur me një element të veprës penale. E kam ndjekur prej shumë vitesh, që kur gatuhej ajo formë privatizimi dhe të gjitha veprat penale që pasuan. Vazhdoj të jem i bindur që rasti i privatizimit të kompleksit Partizani është rast tipik si në librat e kriminalistikës. Nuk dua të hyj në asnjë lloj komenti.

Sot në Shqipëri janë dy botë, PS që nuk bën asnjë koment për asnjë akuzë që ngrihet ndaj njërit prej nesh. Keni dëgjuar ndonjë nga përfaqësues të PS të komentojë vendimet e prokurorisë e gjykatës? Kemi rastin tjetër dhe e kuptoni qartë që është një korrupsion i pastër. Një funksionar public përdor firmën, pozicionin dhe funksionarët e tij brenda ndërtesëspër përfitime të paligjshme apo lehtësim procedure. Këtu është korrupsion se janë krijuar miliona pasuri.

Prej dy ditësh nga kati i 8 me një mikrofon në dorë dhe duke valëvitur flamur të PD-së, Berisha iu drejtua disa militantëve që grumbullohen në rrugën “Mustafa Matohiti”, duke thyer vendimin e 30 dhjetorit 2023, kur GJKKO vendosi që të mos kishte komunikim me asnjë person, përveç bashkëjetuesve të tij, që në rastin e ish Kryeministrit është vetëm bashkëshortja Liri Berisha.

Madje Berisha në shpërfillje të plotë të vendimit të GJKKO tha se ka vonuar kaq shumë për të komunikuar jo për shkak të vendimit të Gjykatës, por për shkak se kishte grip, eksperiencë nga e cila kishte kuptuar se nuk do ta bënte më vaksinën se ia imponon regjimi i Ramës. 

S.G/Shqiptarja.com

TAG:
• spak heton partizanin
• taulant balla
• sali berisha