Berisha në ‘foltore’ me shqiptarët në Itali: Po të mos ishte antimafia italiane, Tahiri do ishte më shumë se zv.kryeministër

Sali Berisha ka kujtuar historinë e të moshuarës nga Vlora pasi përfundoi në gjyq për ndërtimin brenda rrethimit të shtëpisë të një ndërtese që mund të shërbejë si kotec për pulat. Teksa i referohet pallateve dhe ligjit për konfiskimin e ndërtimeve pa leje, Berisha thotë se Rama merret me të moshuarën dhe nga ana tjetër legalizon kullat. Sipas ish kryeministrit, kjo është arsyeja përse qytetarët po largohen nga Shqipëria.

“U zotua se do të përdorë ligjin. Çfarë përdorimi bëri. Ndjek penalisht një zonjë 82-vjeçare në Nartë se ka ndërtuar një kotec pulash pa leje. Ndërkohë që kullat në mes të Tiranës thotë se do ti legalizojë në kundërshtim me çdo ligj.

Ky është i lidhur, këmbë e krye me krimin dhe drogën. Kjo përbën një vështirësi tjetër për shqiptarët. Pasiguria e madhe i detyron ata të largohen masivisht nga Shqipëria.

Varfëria në rritje. Shqipëria po polarizohet në mënyrë të rrufeshme. Vitin e kaluar INSTAT thotë se Shqipëria pati një rritje ekonomike 9.3 %. Çdo njeri që e dëgjon këtë shifër thotë se ky qenka vendi i punës. Po punësimi sa ishte, sipas INSTAT, punësimi u rrit gjithsej me 0.4 %. Ata që kanë njohuri elementare e kuptojnë se 9.3 % është mali i narko eurove. Nuk përkthehet në asgjë, mirëqënie prosperitet për qytetarin shqiptar”, tha Berisha.

Ish kryeministri Sali Berisha tha në ‘foltoren’ virtuale me shqiptarët në Itali se rroga më e ulët në rajon është në Shqipëri. Ndërsa për rritjen e çmimit të energjisë elektrike për familjet që shpenzojnë më shumë se 800 KWH në muaj, Berisha thotë se Rama e bën për t’i shpallur luftë shtresës së mesme.

“Sot kemi rrogën mesatare më të ulët në rajon, 20-30% më të ulët se Kosova. Ju ngritët shqetësimin për çmimet. Bordet komuniste tha Rama janë të dobishme. Po, janë të dobishme sepse cakton çmimin që do. Dhe me çmimet e rritura cakton të ardhurat e tij. Rama caktoi gjithsej 50 mln për shqiptarët. Tani ka bërë një rritje të jashtëzakonshme të energjisë. Përse? Do të godasë shtresën e mesme, i ka shpallur luftë të hapur shtresës së mesme. Një shoqëri pa shtresën e mesme, kurrë nuk mund të zhvillohet”, tha Berisha.

Në bashkëbisedimin me shqiptarët në Itali, Sali Berisha ka kujtuar takimin me Silvio Berlusconin në vitin 2015 duke i thënë se i bëri përshtypje pozitive kur folën fjalë të ngrohta për emigrantët.  

“Në vitin 2005, pasi formuan qeverinë unë bëra një vizitë në Itali dhe aty takova mikun tonë të shquar, Silvio Berluconin dhe drejtues të tjerë të qendrës së djathtë. Ajo që më bëri përshtypjen më pozitive ishin fjalët shumë të ngrohta dhe të vërteta që Berlusconi, Fini dhe Casini folën për emigrantët shqiptarë.

Ne na thanë ata, me shqiptarët këtu nuk kemi asnjë problem, por vetëm zhvillime pozitive. Kjo shënonte një arritje të madhe të shqiptarëve në Itali. Kanë kaluar 17 vite, dhe këto rekorde vetëm se janë përmirësuar gjithnjë e më shumë. Janë përmirësuar me shpejtësi të madhe”, tha Berisha.