Kryetari i Partisë Demokratike, Sali Berisha, është shprehur se Policia përdori spraj ariu kundër militantëve të tij, gjatë protestës së sotme.

Gjatë fjalës së tij pas daljes nga Spitali i Traumës, Berisha tha se spraj i ariut që sipas tij është përdorur gjatë protestës, në disa raste është edhe vdekjeprurës.

Më tej Berisha tha se Policia hodhi bomba molotovë nga tarraca e Kryeministrisë në drejtim të protestuesve. Sipas Berishës, nga bombat molotovë të hedhura nga tarraca e Kryeministrisë, u plagos në kokë edhe një efektiv policie.

“E pash tha që e morën Klevisin egërsisht falangat e Skënder Ballukut dhe Sokol besëprerit, i cili në vend që të ishte në burg nja 30 vite, për shokun që tradhëtoi dhe që e dogjën në makinë në Qafë-Muzinë, komandon tani policinë. Bombulat e sprait kishin imazhin e ariut. Çka do të thotë se ishte sprai ariu. Sprai i ariut në raste të caktuara është vdekjeprurës. Në rastin e personave që kanë vagotoni të shtuar për shkak të dhimbjeve që mund të reflektohen në zemër me arrest kardiak, në rastin e personave që kanë astmë bronkiale. Pra përdorimi i tij është një vepër e rëndë penale, një vepër që dënohet në konventa dhe absolutisht e ndaluar për përdorim. Janë hedhur nga taracat bomba molotovë mbi protestuesit. Plagosën edhe një polic në kokë me shishe molotov të hedhur nga taraca.

Kanë hedhur granata zhurmuese dhe kanë plagosur te këmbët shumë protestues. Kemi të bëjmë me një skenar shtazërie të vërtetë të Skënder Ballukut, i cili ka marrë përsipër Ramës dhe Lubisë se do ua mbyllë çështjen me qytetarët. Rama-Balluku nuk mbyllet më. Kanë sulmuar edhe gazetarët sot. Kalaja rezulton me kontuzion të indeve të buta në zonën e trurit. Skaneri në stadet e tij të fillimit nuk e zbulon dot. Goditja ka qenë e qëllimshme. I kanë shkuar nga pas dhe e kanë sulmuar. Një strategji që ngjitet në nivelet e akteve terroriste nga Policia. Këta inskenojnë sikur ka policë të plagosur, kur në fakt ata janë shëndoshë e mirë. Pyeta në spital dhe më thanë që policët nuk kanë asgjë”, tha mes të tjerash Berisha.


Lajmi kryesor:

Protesta/ Militantët e Berishës molotovë drejt Kryeministrisë, policia i shpërndan me shpejtësi! Strategjia e drejtorit të ri, Hita s’lejon përshkallëzimin, 20 të shoqëruar