Berisha: Rama i shërben
Shqipërisë apo Serbisë?

KORÇË – Edi Rama po i shërben Shqipërisë apo Serbisë? Me këtë pyetje Kryeministri Sali Berisha ka vazhduar edhe sot sulmet ndaj rivalit të tij kryesocialist. Ndërsa ndodhej për një vizitë në muzeun e shkollës “Mësonjëtorja e parë shqipe”, Kryeministri akuzoi përsëri Ramën si shkaktar i bllokimit të proçesit integrues të Shqipërisë në Bashkimin Europian.

“Një herë është pro e një herë është kundër Kodit Penal”, tha Berisha duke shtuar se Rama “10 ditë më parë bllokoi kodin penal. Nuk e di pse e bën këtë”. Ndërsa “dje u zotua se do të votojë gjithçka për statusin”.

Kryeministri më tej shtoi dozën e akuzave ndaj liderit socialist: “Nuk e di kujt po i shërben, Shqipërisë apo Serbisë. Serbia nuk ka opozitën që ka Shqipëria”, deklaroi Berisha duke lënë të kuptohet se ky është edhe motivi pse përparon më shpejt se vendi ynë.

Ai shtoi se shqiptarët mbeten të angazhuar të integrohen në Bashkimin Europian dhe se, gjithësesi, vështirësitë e hasura kohët e fundit janë të përkohëshme.

(im/shqiptarja.com)