Deri në 250 mijë njerëz protestuan paqësisht në qendër të Mynihut kundër regjimit iranian, në atë që gazeta gjermane Bild e quan "protesta më e madhe e mbajtur ndonjëherë në qytet".

Shumë prej protestuesve valëvitën flamuj amerikanë dhe izraelitë. Autoritetet paralajmëruan se mund të kishte ndërprerje në transportin publik dhe se dy linjat e vetme të trenit që nisen nga Theresienwiese, ku u zhvillua marshimi. mund të jenë të mbipopulluara.

Protesta u zhvillua në kuadër të Konferencës së 62-të të Sigurisë në Mynih . Ajo u thirr nga figura më e shquar e opozitës së Iranit, Princi i Kurorës Reza Pahlavi.

Kur Reza Pahlavi mbërriti në Mynih me truprojat e tij rreth orës 14:45, shumë protestues mezi i përmbanin emocionet.

Sipas Bild, Pahlavi u prit si një yll popi. 

Në një intervistë në MD Meets, Pahlavi shprehu dyshime për suksesin e negociatave midis Presidentit të SHBA-së, Donald Trump dhe Iranit.

Në vend të kësaj, ai bëri thirrje për një sulm ushtarak kundër regjimit iranian .

"Iranianët që duan lirinë presin një ndërhyrje ushtarake që synon instrumentet e shtypjes së regjimit. Kjo është një ndërhyrje humanitare. Do të ishte pothuajse si një mision shpëtimi.", tha ai.

Ndërkaq, të dërguarit amerikanë Steve Witkoff dhe Jared Kushner do të zhvillojnë negociata me Iranin të martën në Gjenevë, me përfaqësues nga Omani që veprojnë si ndërmjetës.

Më 6 shkurt, delegacionet e të dyja vendeve zhvilluan bisedimet e para të ndërmjetësuara nga Omani.