Dhunohet një biznesmen në Tiranë. Ngjarja ka ndodhur në orët e vona të mbrëmjes së djeshme në rrugën “Merdar Shtylla” në Komunën e Parisit, afër banesës së tij.

Shqiptarja.com dhe Report Tv mësojnë se bëhet fjalë për biznesmenin Andrea Zoga që ka disa aktivitete në Tiranë si Fast Food-e dhe restorante, mes tyre rrjetin e njohur Big Bite. Ai është dhunuar keq nga 4-5 persona që i kanë zënë pritë afër shtëpisë së tij.

Ekstrakti i nxjerrë nga QKR

Sipas dëshmisë së tij, personat në fjalë kanë zbritur nga një makinë tip Golf dhe e kanë dhunuar pa shkak. Nga dhuna e ushtruar, biznesmeni ka marrë plagë në trup e kokë dhe është dërguar menjëherë në spitalin e Traumës.

Shqiptarja.com dhe Report Tv kanë mundur të sigurojnë edhe një foto nga shtrati i spitalit ku ndodhet i shtrirë Zoga. Njërin sy e ka të mbullur dhe të nxirë, ndërsa shenjat e dhunës janë të freskëta edhe në fytyrë.

Për ngjarjen në fjalë, siç thonë burimet policore biznesmeni nuk ka depozituar ende një kallëzim.