Blendi Klosi: Në administratë do
ketë rifreskim pozitiv, jo fshesë

TIRANE - Në një intervistë në “Airport” në A1Report për gazetaren Anila Basha, sekretari organizativ i Partisë Socialiste, Blendi Klosi, shprehet për synimet e qeverisjes së re të Partisë Socialiste. Si do të veprohet me administratën, me institucionet kushtetuese dhe për ndarjen e përgjegjësive mes aleatëve.

Zoti Klosi, përshëndetje dhe mirëseerdhët në studion e “Airport”...
Falemnderit juve për ftesën, kënaqësi dhe falemnderit për ndjekjen e fushatës. Ka qenë një tv që është ndjekur shumë, sidomos ditën e zgjedhjeve.

Në fakt më duket se na paragjykoni kështu, sepse nuk është se ne ndoqëm vetëm fushatën e PS...
Jo nuk u shpreha kështu. E thashë për informacion. Por në një kohë kaq të shkurtër ky televizion është ngritur shumë. Eshtë një kompliment që duhet bërë për ne që merremi me politikë dhe e kemi shumë të lidhur profesionin tonë që ndjekim median, kemi ndjekur dhe zhvillimet në A1Report. Por nëse doni të flas si përfaqësues i opozitës, realisht ka qenë një televizion që gjen lajmin e vërtetë. Dhe sa i përket ditës së zgjedhjeve, ju nuk kishit në dorë të ndryshonit rezultatin, por kishit në dorë të ndiqnit live dhe në kohë reale ndryshimet e rezultatit dhe ishte e prekshme nga ana jonë dhe të gjenim si shkonin rezultatet. Dhe kur ne shihnim votat që shtoheshin e shtoheshin, kjo të lë një ndjesi të mirë që unë do ta ndaja me publikun tuaj.

Falemnderit për konsideratat. Ne ndërkohë sipas perceptimit tuaj dhe të publikut, jemi rritur goxha në kaq pak kohë. Por duket se PS nuk u rrit shumë në mandate në këto zgjedhje zoti Klosi...
E kemi diskutuar disa herë këtë historinë e fitores së PS. Të gjithë e kemi të qartë se gara ishte midis PS e PD, Edi Ramës e Sali Berishës. Filozofisë së PS, botës së re të Rilindjes dhe asaj çfarë Sali Berisha përfaqësonte. Gara kjo ishte dhe u fitua në mënyrë spektakolare nga PS. Do të doja që edhe nëpërmjet ekranit tuaj të kishim ndonjë ndjesi si ishte rezultati. Ishte një rezultat spektakolar i opozitës së djeshme dhe maxhorancës së sotme, spektakolar sepse gjetëm kohezionin me një masë shumë të madhe të qytetarëve. Dhe sa i përket ndarjes së mandateve, është sistemi që kemi zgjedhur me koshenciencë të plotë. Unë jam ndër ata që hyj te grupi i njerëzve që them se kemi bërë shumë mirë që kemi ndryshuar sistemin elektoral. Eshtë një sistem që përshtatet shumë mirë me realitetin. Dhe është i projektuar që të mos lejojë fitore.Në radhë të parë është një sistem koalicionesh. Një parti e vetme nuk mund të fitojë.
 
Po dhe kjo u tregua fare qartë me dy forca të reja politike: FRD dhe AKZ...
Nuk është situata si në 2009 ku ne patëm një rezultat të madh, por humbëm për një varg arsyesh që është e nevojshme t’i ridiskutojmë e rikujtojmë. Por edhe sepse nuk arritëm të krijonim një koalicion të gjerë në 2009. Në 2013 ne kemi pasur shumë mirë të qartë që sistemi është i atillë që kërkon koalicion. Dhe ne bëmë një punë shumë të madhe dyvjeçare për të zgjeruar koalicionin.
 
Po korrigjuat gabimin e 2009 ku ju dështuat për krijimin e një koalicioni të gjerë...
Kjo është një gjë që duhet të diskutohet. Në 2009 ka qenë po e njëjta kërkesë nga ana jonë. Në 2013 nuk mund t’i lejonim vetes të mos e përpunonim si ide. Ngritëm një sekretariat të posaçëm, punuam gjerësisht për të zgjeruar koalicionin me 34 parti. Natyrisht bashkimi me LSI ishte thembra e Akilit, një shtysë shumë e madhe e cila solli fitoren e PS, të Edi Ramës, të filozofisë së tij tetë vjeçare. Ndarja e mendjes që ky sistem është sistem koalicionesh, na solli ne fitues. E kishim të qartë që ditën që pranuam të ishim bashkë me LSI, që ashtu sikurse del fitues me koalicion, po ashtu brenda koalicionit është i projektuar në mënyrë të tillë. Eshtë një sistem miks gjerman e spanjoll ku ndarja brenda të njëjtit koalicion eshtë i atillë që të përfitojnë të gjitha partitë e vogla.
 
Dmth ju doni të na mbushni mendjen se PS nuk donte më shumë se 66 mandate?
Jo nuk është kjo. PS mund të dojë edhe 140 mandate.
 
Po nuk u përkthye fitorja në mandate...
Po kemi shtuar edhe në Durrës edhe në Tiranë mandate. Kemi shtuar mandatet e opozitës...
 
Po në listën e Tiranës keni dhe Spartak Brahon që është i LSI, nuk është mandati juaj...
Po mirë, pra mirë, por ishte votë për PS...Ishim koshient që ditën që e morëm këtë vendim e dinim që do të ishte e vështirë që të merrnim 70 mandate vetë. Sepse po të kishim hyrë vetëm unë jam i bindur që do të fitonim, natyrisht do të fitonim jo me 83 apo 84 mandate, por me 72 apo 73 mandate. Do të ishte e vështirë për tu menaxhuar gjithçka deri ditën e zgjedhjeve, sepse filozofia e qeverisjes së sotme dhe e Sali Berishës ishin të mëdha deri ditën e fundit për të manipuluar rezultatin. Por një rezultat kaq i lartë fitues përmbushi në fund të fundit misionin tonë. Siç e thashë kjo lëvizje në garë e dy ekipeve, garë apo ndërmjet Sali Berishës në fakt ishte një garë mes dy botëve. Kjo botë e re kishte nevojë që ne të falnim diçka nga vetja dhe e falëm këtë koalicion.
 
Pse nuk e falët në vitin 2009?
Me shumë bindje po e them për 2013 që ne fituam si filozofi. Fitorja është shumëdimensionale e Partisë Socialsite dhe Edi Ramës dhe ekipit të PS-së dhe gjithë strukturave të kësaj partie.
 
Edi Rama ka meritat e fitores, po ai militanti poshtë në bazë që e ndjenë më shumë në fakt këtë histori duket sikur janë të bojkotuar.. Nuk ndihet shumë Z.Klosi aroma e fitores së Ps-së, njerëzit duken më shumë të orientuar drejt Lsi-së...
Kjo që thoni është histori që mund ta diskutojmë. Por kur them Edi Rama dhe Partia Socialiste nuk kam parasysh Edi Ramën vetëm si Edi Rama, po kam parasysh 100 mijë anëtarët e Ps-së, militantët që na kanë mbështetur në këto 8 vjet opozitë. Fitorja është e bukur dhe është për tu analizuar dita e fitores, data 23 qershor. Po kjo datë nuk do ishte kaq e bukur nëse nuk do të kishte një punë të madhe 8-vjeçare. E përsëris, një opozitë të suksesshme edhe kjo e ideuar nga Edi Rama, nga militantët...

E suksesshme?
Jo e suksesshme po shumë e suksesshme. Rezultati dëshmoi këtë. Ne arritëm që në 2009 të ishim baraz me një pozitë që vinte me disa punë të realizuara dhe me një frymë se mund të vazhdonte. Akoma nuk ishte që edhe Partia Socialiste të pranonte koalicionin e madh. Kishte kërkesa ekstremiste, të paimagjinueshme në 2009. Kjo ka qenë historia. Forcat e mëdha politike kërkojnë koalicion po kanë dhe përgjegjësitë e tyre. Edhe LSI në vitin 2009 ishte me filozofinë që do të bënte namin e vetme, ishte e jo mirë menaxhuar dhe ajo na solli prap që ne të ishim fitues. Megjithatë them që 2009 ka qenë fituese për të majtën. Mbani mend që Ilir Meta nuk u paraqit midis të majtës dhe të djathtës, por u paraqit si e majtë ekstreme. Doli me shprehjet “unë jam opozita e vërtetë” “unë do fus Sali Berishën në burg”. Realisht në 2009 e majta dhe e djathta u ndanë barazim, 70 me 70 dhe mos të harrojmë manipulimin e madh, por edhe atë sesi kuptohej formula elektorale në atë kohë. Ne kemi humbur mandatin e pestë në Berat me më pak se 200 vota.
 
Duket sikur njerëzit nuk votuan Berishën, jo se votuan Edi Ramën..
Tani njerëzit nuk votuan Berishën, votuan Edi Ramën dhe duket sikur kështu, duket sikur ashtu, është me sikur. Nuk është e mjaftueshme me sikur. E rëndësishme është çfarë ndodhi. Po them, ne brezi që bëmë opozitën në këto 8 vjet, realisht do duhet të ndihemi shumë mirë, meqënëse gjithë diskutimi u hap nga ajo sesi ndihem militantët, ata të cilët i shërbyen kësaj kauzeze, ndihet shumë mirë që ne realizuam një mision shumë të madh; largimi i Sali Berishës. Tani fillon një jetë e re, një ditë tjetër për Partinë Socialiste, për militantët, për mbështetësit të cilët ashtu siç dëshmuan që ishin një opozitë e fortë, duhet të dëshmojnë që janë një forcë e përgjegjshme për fatet e këtij vendi. Këtë do ta dëshmojmë nga shtatori e tutje, por debati i sotëm është një falenderim shumë i madh për të gjithë ata që kontribuan. Unë për veten time u ndjeva shumë mirë atë ditë. Ka qenë dita më e lumtur e karrierës sime politike.
 
E ndjetë si një fitore të mundimshme?
Ishte një fitore e lehtë, por një siklet i madh në ato ditë, sepse kudo që shkoje gjeje një mbështetje shumë të madhe popullore.

A do ta përktheje dot në mandate apo jo?
Po. Ndjeje një besim shumë të madh të njerëzve tek lidershipi i Partisë Socialiste, tek Edi Rama, tek ne që ishim në terren. Sikleti ishte shumë i madh ato ditë, nëse do të ishte kjo mbështetje popullore e përkthyer në mandate, a do ndodhi gjë ditën e fundit, a do futet policia të manipulojë votat, apo do futen grupet e inkriminuara të mbështetura nga qeveritarët haptazi gjatë procesit zgjedhor... Pra a do kishim ne më fytyrë tu dilnim përpara njerëzve ku kudo që shkoje gjeje një mbështetje kaq të madhe popullore. Prandaj them që ka qenë një ditë shumë e lumtur, që pati rezultat kaq të mirë fitues dhe jam këtu për të shprehur një ndjesi vërtetë shumë të lumtur që unë kam nga rezultati i zgjedhjeve. Lufta ishte midis opozitës dhe mazhorancës dhe këtë duhet ta themi fare qartë, por në radhë të parë ishte midis PS-së dhe PD-së, Edi Ramës dhe Sali Berishës, filozofisë sonë dhe filozofisë së atyre.

Luftën e bëtë ju, pra dy kampet, por u forcua shumë LSI...
Siç u forcua LSI u forcua edhe PDIU.
 
Pse u forcua LSI?
Siç u forcua LSI u forcua edhe PDIU dhe PR. Me po të njëjtin raport u forcuan dhe ata. E thashë sistemi ishte i atillë, që nuk lejonte që votat të shkonin vetëm tek partia më e madhe.
 
Si sekretar organizativ nuk ndiheni pak i kërcënuar nga fakti që Lsi po rritet nga dita në ditë?
Normal ky është objektivi kryesor i çdo partie.
 
Ka shumë njerëz që janë larguar nga PS-ja tek LSI-ja...
Kjo historia e njerëzve është  diçka që hajt ta diskutojmë. Siç ka njerëz që janë sot në Partinë Socialiste por që nuk kanë qenë kurrë në PS, ashtu ka dhe njerëz që janë në LSI po nuk kanë qenë kurrë në të majtën. Lsi është krijuar si një ndarje e së majtës dhe prap them që çelësi magjik i fitores kësaj radhe ishte që ne së bashku të ishim në garën elektorale. E majta e bashkuar dëshmoi që fitoi në çdo cep të Shqipërisë. Sa i përket asaj nëse ne jemi të kërcënuar nga LSI, përgjigjja është aspak. Kjo ishte garë elektorale, kjo ishte një raport me qytetarët kur realisht ne morëm 100 mijë vota më shumë.
 
Sivjet erdhën edhe shumë emigrantë, në 2009 nuk pati këtë fluks...
Ne bëmë një punë që ju e keni ndjekur. Një punë 2 vjeçare ku shkuam derë më derë dhe kërkuam çdo votë të majtë. Bëmë një census politik shumë të suskesshëm në gjithë territorin, punuam si milingonat e pa bërë më parë nga një opozitë shqiptare. Kemi bërë një punë shumë të madhe, ndaj ndihemi shumë mirë për fitoren e arritur. Ne ishim koshient, e prisnim që në momentit që LSI u bashkua me ne, se edhe ajo do të kishte një rritje në numrin e saj të mandateve. Natyrisht votat e veta duke ia shtuar koalicionit, duke e bërë fitoren të sigurtë jo vetëm ditën e votimit, po të sigurtë që në ditën që u bashkua dhe kjo erdhi frymë që u bashkua dhe u pasqyrua në mandate. Ne ishim në koalicion dhe gara nuk ishte më midis PS-së dhe Lsi-së. Pra, në terren ne asnjëherë nuk e pamë LSI si rivalen tonë.
 
Ka pasur qytete ku ka pasur përplasje mes LSI dhe PS...
Unë po them në parim dhe në filozofi. Mos të merremi me detaje. Tani që bëhet kronika e betejës ne kronikanët e kemi të vështirë të merremi me detajet e saj. Në filozofi asnjëherë LSI nuk u pa si kundërshtare. Ne na vinte mirë kur kolegu i LSI arrinte të siguronte vota të djathta, apo vota që ishin të lëkundura. Ne ndiheshim mirë kur Lsi merrte edhe një kështjellë edhe një betejë...
 
A mund t’u jepni një sqarim të gjithë atyre skeptikëve të cilët thonë, a nuk ra Rilindja me marrëveshjen e 1 Prillit? A do të mund PS-ja të luftojë korrupsionin kur Lsi ka qenë edhe strumbullari i korrupsionit në qeverisjen e PD-së?
Kjo është një pyetje që ka shoqëruar gjatë gjithë kohës debatin politik në Shqipëri. Natyrisht ajo që ne kemi thënë dhe do e themi nga shtatori e tutje me veprime konkrete, se deri  tani e kemi thënë me fjalë. Do të kthehet në aksion të qeverisë të PS-së, së mazhorancës se nuk janë emrat e përveçëm ata që shkatërrojnë por sistemi i qeverisë së Sali Berishës që të kishte një luftë të vërtetë anti-korrupsion apo mekanizma, sepse shteti nuk është vetëm policia. Shteti është më shumë sesa kaq, është sistemi, struktura është ligji. Modeli që ofron ministri apo kryeministri, titullarët e institucionit, pastaj është një model që shkon në të gjithë piramidën. Si mund të luftonte Sali Berisha korrupsionin kur vetë ata ishin simbole të korrupsionit. Si mund ta luftonte ai korrupsionin kur vetë ai i përfshirë në afera skandaloze, si mund ti kërkonte dikujt poshtë tij mos ta bënte, kur ishte ai i pari që e bënte. Kjo do të jetë një nga sfidat më të forta të qeverisjes sonë. Si do ta dëshmojë në radhë të parë modeli dhe sistemi.

Edi Rama në mediat e huaja ka thënë se do ta nis nga ngjyrat?
Edi Rama e ka dimensionin e të bukurës dhe kjo është një nga gjërat që e bën më tërheqës tek opinioni publik.
 
Këtë të bukurën pse e bëni të shëmtuar. Kalova dje në Llogara ku janë prishur në fakt ndërtesat nga pushteti vendor, por rrënojat janë po aty?
E bukura është shumë e mirë për opinionin publik, por nuk do majftonte e bukura apo lyerja e pallatave në Tiranë nëse nuk do pastrohej Lana. Nuk do mjaftonte zbukurimi i dy tre parqeve nëse nuk do prisheshin ndërtimet pa leje. Kjo bëri diferencën në Tiranën e drejtuar nga Edi Rama. Sot Plani Rregullues i Lul Bashës po dëshmon ndërtime të stërmëdha në Bllok, në qendrat e qytetit, heqja e mbrojtjes publike nga pozicione të caktuara të qytetit që ta paktën Edi Rama i ruajti i konservoi...
 
Ta mbyllim tek çështja e organizimit..
E bukura është gjë më vete. Është atraksion, të pëlqen por ama konkretja është më e rëndësishme. Natyrisht Edi Rama do punojë me të bukurën dhe unë kam bindje të thellë dhe kjo mund të jetë një ndër gjërat më të mira që ne do bëjmë, që ta pastrojmë këtë vend. Shqipëria ka nevojë të pastrohet.
 
Nga klasa politike e korruptuar?
Dakort, po po them ta pastrojë fizikisht. Mos të ketë mbeturina, mos të ketë plehra, siç nuk ka plehra tek Lana. Do punojë shumë që shqipëria të jetë e bukur dhe ky është një dimension shumë i rëndësishëm i Rilindjes. Por nëse nuk do të kemi direkt prekjen dhe ndryshimin e ekonomisë së qytetarit shqiptar, realisht nuk do të jemi të suksesshëm dhe s’do jemi realisht tek interesat e tij. Nuk mjafton vetëm ta pastrojmë nga plehrat, por mos të ketë më plehra. Kjo është filozofia e Edi Ramës dhe mendoj se ai ka të gjitha aftësitë dhe vullnetin e nevojshëm që ta realizojë këtë.

Z. Berisha thotë se janë rreth 30 kriminelë në listat e PS-së, një akuzë që po e dëgjojmë shpesh edhe nga zoti Olldashi dhe Basha, së fundmi?
Është e çuditshme dhe realisht është për të ardhur keq dhe për të menduar se me kë kemi të bëjmë dhe se sa mirë kemi bërë që kemi fituar. Saliu bëri atë që bëri në 22 vjet dhe mendonin të gjithë që me humbjen e zgjedhjeve do të largohej. Shikojmë jo vetëm që nuk jepet, jo vetëm që nuk pranon humbjen kaq spektakolare.

Dha dorëheqjen...
Çfarë dorëheqje është ajo që ndryshon pozicion dhe drejton sërish mbledhjen e PD-së dhe thotë që unë do ndërroj rregullat e lojës, ndërroj garën, vendos procedurën.

E ka pranuar dorëheqjen Zoti Berisha...
Po dhe do punoj 16 orë për të drejtuar partinë demokratike. Dorëheqje është kur ikën. Nuk po them për qeverinë po them për partinë.

Pse keni kaq padurim për ta parë këtë fenomen?
Lufta jonë në të vërtetë nuk ishte të hiqnim Sali Berishën si person. Kjo është një pjesë e vogël. Kufta kryesore ishte të hiqnim berishizmin, mënyrën e bërjes me hile dhe me konflikt të politikës. Me çfarë po shohim në garën e dy të zgjedhurve të Saliut për të bërë gjoja garë. Ku ka ndodhur që humbet në datën 23 qershor nuk pret as 30 ditë që të merret vesh rezultati po bën direkt garën për  kreun e PD-së. Lërë të diskutohet në forume. Lërë partinë Demokratike të marrë frymë pa Saliun dhe të vendosë pa Saliun. Kjo do të thotë që ska dhënë dorëheqjen. Kjo duhet hequr nga politika shqiptare, politika me hile, arroganca, konfliktualiteti. Në ngjarjen e 21 janarit gjithë politika duhet të jetë me njëfarë pendese, jo siç del kandidati për PD-në dhe thotë që do i vrisja të gjithë ata që ishin në shesh. Ajo që ndodhi në 21 janar dëshmoi se politika shqiptare nuk ishte përgatitur për demokraci. Ne nuk jemi në politikë për të vrarë njerëz, jemi për të udhëhequr njerëz. Dhe si mund të jetë gara në Partinë demokratike vetëm me sharje. Ku janë këta dy lidera që të tregojnë vizionin e tyre, çdo llaf i tyre është vetëm kundër opozitës. Si do e drejtojnë, ku është ndryshimi? Kjo është filozofia që na pret pas largimit të Sali Berishës?
 
Jeni të shqetësuar ju që kriminaliteti është shtuar në këtë fazën tranzitive të pushtetit?
Dy nga debatet më të forta në këto ditë janë, ndërtimet pa leje dhe krimi. Ndoshta nuk krahasohen mes tyre por të dyja këto dëshmojnë mungesën totale të shtetit. Sali Berisha mund të ketë bërë shumë të këqija, po një gjë bëri shumë të keqe, hapjen e depove në 1997. Një nga objektivat tona do të jetë rendi. Armët sheshit krijojnë kaq shumë krime dhe nëse politika shqiptare dueht të veprojë, e para është se duhet të veprojë me masa shumë të forta për armëmbajtjen pa leje, por duhet të veprojë edhe me shembullin e vet. Sot kemi këto probleme sepse nuk kemi shtet.
 
Rama ka premtuar legalizime për ndërtimet pa leje?
Legalizim por premtoi që do i jap fund procesit të legalizimit. Në të kundërt Saliu ka luajtur 8 vjet me këtë gjë. E keqja më e madhe nuk ishte legalizimi por vazhdimi i këtij procesi. Duhet një vendim, që nga ky moment e tutje mos të ketë më ndërtime pa leje dhe mos ti shkojë mendja njeriu të nis të ndërtojë pa marrë leje më parë. Kjo duhet të marrë fund dhe kjo është ajo që thotë Edi Rama.
 
Në Correire della sera ka thënë që situata kaotike e Shqipërisë na krijon mundësinë që të legalizojmë disa banesa po disa të tjera duhet ti prishim. Kjo është tërheqje mbrapsht?
Kjo nuk ndryshon nga kjo që po them. Nuk ka thënë asnjëherë që do legalizojë gjithçka, por do legalizojë me kosto zero shtëpitë dhe ndërtesat ku jetojnë njerëzit. Nuk do legalizojë ndërtesa të ndërtuara si vila, apo ndërtesa biznesi të ndërtuara në bregdet apo pa leje, apo gjëra që janë në kundërshtim të plotë me llogjikën. Do jetë një nga betejat tona më të forta  bërja e gjësë, mbi të gjitha bërja e gjësë bukur.
 
Në qeverinë e re, cila do të jetë sfida e parë? Nga do ta filloni?
Ju tashmë jeni të informuar që është një grup pune që po përgatit një platformë qeverisëse. Ishim në fushatë elktorale, bëmë një program të plotë të rilindejs dhe e diskutuam kudo me shqiptarët. KY program nuk ishte program sa për fushatë, por të gjitha janë për të bërë një Shqipëri ndryshe. E para do të jetë kthimi i qeverisë në punë. Është një koncept që duket si qesharak, por realisht shteti nuk ka funskionuar.
 
Ju do i shtoni ministritë apo do i zvogëloni?
Po diskutohet dhe struktura e re qeveritare.

Si do i bëni, do hiqni administratën e vjetër për ta zvendësuar?
Nëse do bëhet kjo që thoni ju dhe që thotë zoti Basha nuk është se ne do hapim 300 mijë vende pune në administratë. Kjo nuk është fare pjesë e diskutimit. Ajo që ne duam është që Shqipëria të kthehet në një vend ku punohet dhe me politika fiskale me politika të pastra për punësim të krijohen vendet e reja të punës.
 
Ju nuk do merrni fshesën për administratën?
Kjo është diferenca mes PS dhe PD, sepse ne e shohim forcimin nëpërmjet institucioneve, ndërsa PD e sheh forcimin përmes forcimit të individit. Ne themi që duhet të jenë institucione të forta dhe shtet i fortë, ata thonë të jetë individi i fortë, të jetë Saliu i fortë. Sa i përket administratës publike ka një histori shumë të keqe. Janë tre ligje në të cilat kam asistuar dhe ajo që ka qenë shumë e keqe sidomos në këto 8 vjet ka qenë harrimi i plotë i termit administratë publike dhe nënpunës civil. Pra nëse qeverisja e pas shtatorit do të ketë një sfidë, do të jetë rikthimi i konceptit të nënpunësit civil.
 
Ju do i hiqni këta njerëz që janë sot në punë?
Padyshim nuk do të ketë një fshesë politike, por do të ketë një rifreskim të administratës në sensin pozitiv. Nëse ne do duam që të kemi një punë të re, duhet që edhe njerëzit që punojnë ti përshtaten ritmit.

Cv që kanë nisur të vijnë tek PS, çdo bëhet?
Ky është një debat absurd që ndodh në Shqipëri, sepse një forcë politike që do të vijë në pushtet do të shoh çfarë njerëzish  janë në treg. Asnjëherë nuk ka pasur një transparencë të procesit dhe nëse ka pasur një kërkesë të vetëm ligji i shërbimit civil, ka pasur konkursin. Pozicioni të fitohet me konkurs. Ndërkohë nëse ka pasur një ankesë nga BB, BE nga të gjithë ata që monitorojnë procesin e administratës publike, ka qenë që në 95% të rasteve konkurset kanë qenë të manipuluara. Pra bëhej konkursi sa për sy e faqe, por njeriu ishte në pozicionin e punës. Nëse duhet të ndryshojë kjo duhet të ndryshojë në radhë të parë tek transparenca dhe ta gjesh vendin e punës sepse je i aftë ta bësh atë punë, jo duke kapur kryetarin e partisë së lagjes. Dhe kjo është gjithë kjo filozofia e këtij procesit të aplikimeve online, konkursi dhe ta ndjesh njëherë që nëse je i zoti do punosh. Duhet në radhë të parë që qytetari ta dijë që është kjo transparecë dhe nëse je i zoti hajde provoje. Ky koncpet duhet të ndryshojë.
 
Do ndalemi tek ministritë, sa prej tyre do të marrë LSI?
Siç e kemi thënë edhe publikisht, siç është deklaruar edhe nga dy liderat nuk do të ketë një ndarje, kjo është e këtij dhe kjo e këtij tjetrit. Kjo është një qeverisje e mazhorancës, e cila e votoi në koncpet këtë mazhorancë dhe qeverisja do jetë e përbashkët. Nëse historia e administratës dhe filozofia e para 23 qershorit, ku ky është i joti, ky i imi dhe ne historia politike do na dënojë. Kjo është që qeverisja do jetë e përbashkët dhe nuk do ketë ndarje me flamujl tek tavolina ime me flamur të Ps-së tek ajo tjetra me atë të LSI.
 
Lidhur me shëndetësinë, arsimin dhe Ministrinë e Rendit, do i mbani vetë, apo do ua jepni aleatëve?
Nuk kam asnjë ndjesi për këtë proces. U përpoqa të isha fare i sinqertë me ju dhe transparent. Nuk ka hyrë në këtë debat akoma lidershipi. Nuk ka ende një debat për ndarjen e dikastereve.

Deputetët që do bëhen ministra do lënë mandatin, po Edi Rama do e lërë?
Ka një diskutim sa i përket ndarjes së mandateve dhe ky është një diskutim, i cili ka ardhur për të rritur detyrën e ministrit dhe për të forcuar rolin e deputetit. Ka qenë një debat i madh, më shumë strukturor dhe tashmë kjo është një vendimarrje që është marrë dhe ka të bëjë me një botëkuptim ndryshe të rolit të ministrit dhe atij të deputetit. Por ende kjo histori nuk ka një gjë të fundme, por është një histori që ka marrë vlerësim nga opinioni publik.

Aleatët si do të përfaqësohen,të cilët nuk u përfaqësuan me mandate në parlament, Gjinushi, Milo ?
Kjo është pjesë e vazhdimit të historisë së realizimit të qeverisjes  së re. Bëhet më e vështirë kur flet me emra konkretë. Po padyshim parimet do jenë po ato. Ajo që duhet që ne ta transmetojmë edhe në qeverisje tonë, është që ai koalicion i madh që ne krijuam për garën e fundit elektorale, ku qytetarët na votuan edhe pse ishim kaq shumë, kjo do të duhet të jetë filozofi edhe e qeverisjes sonë,për të pasur mundësi që gjithsecili të gjejë veten e tij në qeverisjen e Partisë Socialiste. Do duhet të jetë një ndarje filozofike dhe kjo ndarje mendoj se ka avancuar ne termat e saj.

Do i ndërroni krerët e organeve kushtetuese?
Do të ketë një trajtim specifik. Është kryeminsitri i zgjedhur me votën e qytetarëve shqiptarë, sigurisht nuk është një kryeministër i mandatuar nga parlamenti por është i zgjedhur për të negociuar. Mazhoranca e dalë nga 23 qershori është edhe për diçka tjetër, për të goditur arrogancën e Sali Berishës, e cila ishte jam unë dhe ska tjetër. Këtë Edi Rama e ka shprehur publikisht dhe mendoj se ka qenë gjithmonë filozofi e Ps-së. Ndarja e pushtetit nga institucionet e pavaruara dhe kuptimi që ne qytetarët na votuan për të qeverisur nëpërmjet kryminsitrisë dhe ministrive dhe jo për të qenë edhe Kreyministër, edhe Prokuror i Përgjithshëm edhe Guvernator Banke.

Lajmi u përditësua

Shkrimi u botua sot në gazetën Shqiptarja.com (print) 18.07.2013
 
Redaksia Online
(b.m/shqiptarja.com)