NEW YORK- Shefi i Diplomacisë së BE, Josep Borrell mblodhi një ditë më parë liderët e Ballkanit Perëndimor, ndërsa janë zbuluar detaje nga takimi. Borrell thotë se kanë biseduar për ndikimin që ka lufta në rajonin e Ballkanit. Borrell ka premtuar se BE do të mbështesë Ballkanin në sfidat që ka sjellë lufta.

“BE-ja dhe Ballkani Perëndimor do të qëndrojnë së bashku në përballje me sfidat që sjellë lufta e paprovokuar e Rusisë kundër Ukrainës në nivel botëror. BE-ja përfshin Ballkanin Perëndimor në nismat e saj për të zbutur ndikimet e luftës”, u tha në njoftimin e lëshuar nga blloku evropian.

Ky takim i Borrell me liderët e Ballkanit Perëndimor u zhvillua një ditë më parë në New York, në kuadër të Asamblesë së Përgjithshme të OKB. I pranishëm është edhe kryeministri Edi Rama.

“Përfaqësuesi i Lartë Borrell dhe liderët e Ballkanit Perëndimor diskutuan se si do të mund të adresojnë së bashku pasojat dëmtuese të kësaj lufte mbi çmimet e ushqimit dhe energjisë dhe të stabilitetit dhe sigurisë në Evropë dhe botë”, thuhet në njoftim.

Borrell gjithashtu u ka premtuar shteteve të Ballkanit Perëndimor se blloku evropian do t’i ndihmojë në sfidën energjetike si në sigurinë kibernetike, nisur nga fakti që Shqipëria, Kosova dhe Mali i zi kohët e fundit kanë qenë subjekt i sulmeve kibernetike.

Ndërkohë, i dërguari i BE-së për dialogun Kosovë-Serbi ka zhvilluar takime me kryeministrin Edi Rama, presidentin e Serbisë Aleksandër Vuçiç dhe kryeministrin e Malit të Zi, Dritan Abazoviç.

Rendit zhvillimet sipas orarit:
Ora 18:12
Rama ‘shtrëngon duart’ me Charles Michel: Me Presidentin e Këshillit Europian

1663776784_3081746966361662945457021900116861725943860n.jpg

Rama nga Nju Jork ka publikuar foto edhe me presidentin e Këshillit Evropian.  

Kreu i qeverisë ndodhet në Nju Jork në kuadër të Asamblesë së Përgjithshme të OKB. Atje kryeministri ka takuar shumë personalitete të politikës. 

G.MO/Shqiptarja.com

Ora 17:05
Rama publikon pamje nga New York: Në Harvard Club për tryezën e diskutimit mbi sfidat dhe përgjigjet shumëpalëshe për paqen

 

Nga New York, Rama publikoi disa foto dhe video ku shkroi përbri mbi sfidat dhe përgjigjet shumëpalëshe për paqen.

‘New York - Në Harvard Club për tryezën e diskutimit mbi sfidat dhe përgjigjet shumëpalëshe për paqen, sigurinë dhe krizën energjetike’- shkroi Rama.

 

G.MO/Shqiptarja.com

Ora 08:42
Lajçak takohet me Vuçiçin në New York: Diskutuam për normalizimin e marrdhënieve me Kosovën

I dërguari i Bashkimit Evropian (BE) për dialogun Kosovë-Serbi, Miroslav Lajçak, është takuar me presidentin e Serbisë, Aleksandër Vuçiç në New York. Lajçak shkruan se kanë diskutuar për normalizimin e marrëdhënieve me Kosovën.

"Pas takimit tim me kryeministrin Kurti në Prishtinë javën e kaluar, kam vazhduar edhe bisedën me Presidentin e Serbisë, Aleksandër Vuçiç në Nju Jork sot. Folëm për rrugën përpara në normalizimin e marrëdhënieve me Kosovën", shkruan Lajçak. 

SI.E./Shqiptarja.com

Ora 08:04
Lajçak takohet me Ramën në New York: Diskutuam për situatën në Ballkanin Perëndimor dhe dialogun Kosovë-Serbi

Kryeministri Edi Rama ka zhvilluar një takim me të dërguarin e BE-së për dialogun Kosovë-Serbi, Miroslav Lajçak. Vizita është zhvilluar në New York, ku Rama dhe Lajçak ndodhen për të marrë pjesë në të Asamblesë së Përgjithshme të Kombeve të Bashkuara.

Takimin e bëri me dije Lajçak përmes një postimi në rrjetin social Twitter, ndërsa ka postuar edhe një foto me Ramën. Lajçak shkruan se kanë diskutuar për situatën në Ballkanin Perëndimor.

“Pata një takim shumë të dobishëm me Edi Ramën në prag të Asamblesë së Përgjithshme të Kombeve të Bashkuara. Ne diskutuam situatën në Ballkanin Perëndimor. Mirënjohës për njohuritë dhe mbështetjen e tij për dialogun e lehtësuar nga BE-ja”, shkruan Lajçak për takimin me Ramën.

Postimi i Lajçak 

Po ashtu takimin me Lajçak e shpërndau edhe kryeministri Edi Rama.

 

Postimi i Kryeministrit Edi Rama 

SI.E./Shqiptarja.com