BRUKSEL, 8 maj /ATSH-AFP/ - Komisioni Evropian e vuri theksin në progreset e realizuara nga Ukraina dhe Gjeorgjia përsa i përket përpjekjeve për tu garantuar qytetarëve të tyre të drejtën për të udhëtuar pa viza në BE.
Bashkimi Evropian akordoi një vit më parë një liberalizim vizash për qëndrime të shkurtra për Moldavinë, një masë shumë popullore që Gjeorgjia dhe Ukraina shpresojnë ta marrin këtë herë nga 28 presidentët dhe kryeministrat evropianë gjatë një samiti në Riga.
"Pavarësisht rrethanave të jashtëzakonshme me të cilat është përballur Ukraina aktualisht, progresi i realizuar (...) është i vlerësueshëm", shkruan ekzekutivi evropian në një komunikatë duke iu referuar konfliktit në Lindje me separatistët prorusë pas aneksimit të Krimesë nga Rusia dhe vështirësive ekonomike të vendit.
"Progreset e Gjeorgjisë kanë qenë domethënëse në një kohë shumë të shkurtër dhe ato kanë qenë në një linjë me kushtet e vendosura", shtoi Komisioni.
Edhe Gjeorgjia gjithashtu ndodhet në pozita jo të mira me Rusinë përsa i përket republikave separatiste të Abkahazisë dhe Osetisë së Veriut. Tensionet kanë degjeneruar në një luftë të afatshkurtër në gusht të vitit 2008.
"Autoritetet e dy vendeve kanë punuar shumë", theksoi një burim evropian. Ka ende gjëra për të bërë, por Komisioni tregon se dëshiron t'i japë kësaj çështjeje një prioritet duke premtuar një vlerësim tjetër para fundit të vitit.
Ky mendim i Komisionit, shumë i pritur nga Kievi dhe Tbilissi, do të shërbejë për drejtuesit evropianë të mbledhur në Riga me homologët gjeorgjian, ukrainas, moldav, armen, azer dhe bjellorus më 21 dhe 22 maj, gjatë një samitit kushtuar partneritetit lindor të BE-së./
/ec/