Burg për Babalen, Salianji: Prokurorinë e urdhëroi Rama, hetimin e bëri Fatmir Xhafaj

"Prokuroria zbatoi urdhrin kriminal të Edi Ramës". Kështu u shpreh deputeti i PD, Ervin Salianji duke iu referuar kërkesës së prokurorisë e cila kërkoi sot arrest me burg për Albert Veliun, i njohur ndryshe si "Babalja" për kallëzim të rremë, në rastin e denoncimit të videopërgjimit të pretenduar të Agron Xhafajt. 

Në një deklaratë për mediat nga selia blu, Salianji tha se Rama e shpalli vëllain e ministrit të Brendshëm të pafajshëm që ditën e parë të denoncimit të skandalit. Sipas tij, hetimi për dosjen u kryesua nga ministri i Brendshëm Fatmir Xhafaj i cili sipas tij kërkoi hetimin e çështjes vetëm pasi Agron Xhafaj u largua bga Shqipëria në drejtim të Italisë.  

Rama që ditën e parë tha se ishte e montuar, prokuroria kështu vendosi. Që ditën e parë Rama shpalli të pafajshëm Agron Xhafajn për akuzat për trafik droge dhe prokuroria kështu vendosi. Edi Rama arreston denoncuesit dhe jo kriminelët. Denoncimi i pafajshëm i vëllait të ministrit ka qenë qëllimi i Prokurorisë. Hetimi është drejtuar personalisht Fatmir Xhafaj, në kontrollin e të cilit janë si prokuroria e përgjithshme dhe prokurorja e krimeve të rënda.

Ervin Salianji deputet i PD

Deputeti demokrat, Ervin Salianji publikoi në maj të këtij viti audiopërgjimin e Albert Veliut. Ndaj tij prokuroria e Krimeve të Rënda nuk ka regjistruar asnjë procedim penal, ndërsa ka kërkuar arrestimin e Albert Veliut (Babales) dhe kunatit të tij Fredi Alizoti. 

Deklarata e plotë e Ervin Salianjit:

Askush nuk u habit sot nga kërkesa e prokurorisë që, nën urdhrat e regjisorit Edi Rama, zbatoi skenarin kriminal të urdhëruar prej tij 5 muaj më parë për të shpëtuar vëllanë e Ministrit të Brendshëm nga akuza për trafik droge.

• Që ditën e parë, Edi Rama foli për audio përgjim të sajuar. Dhe prokuroria kështu vendosi.

• Që ditën e parë, Edi Rama shpalli se në vend të Agron Xhafës ishte një aktor. Dhe prokuroria kështu vendosi.

• Që ditën e parë Edi Rama shpalli të pafajshëm Agron Xhafën nga akuza për trafik droge. Dhe prokuroria kështu vendosi.

Është e provuar se sa herë kapet në krim, Edi Rama arreston denoncuesit dhe jo kriminelët, duke përdorur çdo shantazh në favor të skenarit të tij kriminal.

Deklarimi i pafajshëm i vëllait të Ministrit të Brendshëm ka qenë qëllimi kryesor i hetimeve të prokurorisë, i paracaktuar që ditën e publikimit të skandalit nga Partia Demokratike.

Me urdhër të Edi Ramës, hetimi u drejtua personalisht nga vetë Fatmir Xhafaj, nën kontrollin e të cilit janë si prokurorja e përgjithshme, ashtu edhe kryeprokurorja e krimeve të rënda.

• Është fakt se Fatmir Xhafaj lejoi nisjen e hetimeve vetëm pasi siguroi largimin e të vëllait trafikant droge nga Shqipëria.

• Është fakt se Fatmir Xhafaj dhe Edi Rama nuk bënë kurrë publik rezultatin e një ekspertize private, që provonte, sipas tyre, se Agron Xhafaj nuk ishte përfshirë në trafik droge. 

• Është fakt se laboratori shtetëror i Ministrisë së Brendshme italiane, i shpallur nga vetë qeveria si më i specializuari në Europë për të tilla ekspertiza, refuzoi të bëhej pjesë e skenarit kriminal të qeverisë së Edi Ramës. Hetimi provoi se prokuroria, në vend që t’i shërbejë zbulimit të së vërtetës, mbron krimin e organizuar, të lidhur direkt me qeverinë.

Edi Rama mund të paguajë, shantazhojë, blejë prokurorë e dëshmitarë, mund të sajojë përkohësisht prova dhe të shpikë aktorë, por nuk do t’ia dalë të mbulojë të vërtetën e përfshirjes së Agron Xhafës në trafikun e drogës.

/b.ha./Shqiptarja.com

TAG:
• ervin salianji
• albert veliu
• dosja babale