Busti i Skënderbeut në Budapest, të pranishëm edhe Meta e Kryemadhi, krah njëri-tjetrit në ceremoni! Presidenti: Lidhjet mes dy popujve, legjendare

Në ceremoninë e vendosjes së përmendores së heroit tonë kombëtar Gjergj Kastrioti në Budapest  ka marrë pjesë edhe  Presidenti Ilir Meta i shoqëruar nga bashkëshortja e tij, kryetarja e LSI Monika Kryemadhi.

Përmes një postimi në rrjetet sociale, Meta shkruan rrënjët e miqësisë midis dy popujve gjenden në lidhjet legjendare të Kastriotit dhe të Huniadit.

“Me shumë kënaqësi dhe emocion të veçantë, mora pjesë sot, me ftesë të Presidentit Ader, në ceremoninë e vendosjes së përmendores së Heroit tonë Kombëtar Gjergj Kastrioti Skënderbeu, në Budapest.

Rrënjët e miqësisë midis dy popujve tanë gjenden në lidhjet legjendare dhe aleancën strategjike të Heroit tonë Kombëtar me Prijësin ushtarak dhe drejtuesin e spikatur të Hungarisë dhe të mbarë Europës Qendrore, Janosh Huniadi, të dy mburoja të vlerave dhe të traditave të qytetërimit, por edhe të identitetit tonë europian.

Ashtu si në kohën e aleancës së Kastriotit dhe të Huniadit, Hungaria mbetet një mbështetëse e palëkundur e integrimit europian të Shqipërisë dhe ne i jemi thellësisht mirënjohës. Jam i bindur se fryma e miqësisë dhe e bashkëpunimit të shkëlqyer tradicional historik midis dy vendeve dhe popujve tanë do të forcohet pa u ndalur në të ardhmen”, shkruhet në postimin e Metës.

Lajmi kryesor:

Busti i Skënderbeut vendoset në Parkun Qendror të Budapestit, Rama dhe Veliaj: Dhuratë nga Bashkia e Tiranës! Të pranishëm në ceremoni edhe Meta e Kryemadhi

K.T./Shqiptarja.com

TAG:
• edi rama
• erion veliaj
• bashkia tirane
• skenderbeu
• budapest
• Hungari