Buxheti 2015, Gjermeni: 2.3 mld lekë
për strehimin, legalizimin dhe turizmin

TIRANE- Rreth 2.3 miliard lekë është fondi për vitin 2015 i Ministrisë së Zhvillimit Urban dhe Turizmit. Ky buxhet është menduar që të përdoret për tre objektiva kryesorë të kësaj ministrie siç janë strehimi, legalizimi dhe turizmi. Ministria Eglantina Gjermeni tregoi me detaje ndarjen e kësaj shume sipas objektivave të ministrisë.

“Janë fonde për planifikimin urban dhe strehimin me vlerë totale 1.9 miliard lekë ose 83 % e vlerës totale të buxhetit. Planifikim, Menaxhim, administrim me vlerë totale 258 mln lekë. Zhvillimi i turizmit me vlerë totale 124 mln lekë. Vend të rëndësishëm zënë investimet publike ku janë parashikuar rreth 869 mln lekë investime”, tha Gjermeni.
 
Rëndësi e veçantë do t’i kushtohet strehimit për të gjithë njerëzit në nevojë, duke përcaktuar fonde për banesa sipas kërkesave të bashkive përkatëse.

“Bashkia Korçë, 70 apartamente me vlerë 230 mln lekë. Bashkia Fier, 40 apartamente me vlerë 92 mln lekë. Bashkia Berat, 35 apartamente me vlerë 92 mln lekë. Bashkia Lushnjë, 35 apartamente me vlerë 116 mln lekë. Bashkia Librazhd, 35 apartamente me vlerë 116 mln lekë”, u shpreh Gjermeni.
 
Sipas Gjermenit 386 milionë lekë do të jenë fondet për subvencionet e kredive të buta për banesa të cilat përfshijnë 215 apartamente. Ministrja Gjermeni i është përgjigjur pyetjes së deputetes Gjylameti se si do të veprohet për koletaralin qe kërkojnë bankat nga njerëzit në nevojë.

“Banka vepron për dhënien e kredive për qytetarët në nevojë sipas listave që vijnë nga njësia vendore dhe banka e ofron vetë ketë kolateral, në kuptimin që nuk kërkon nga këta qytetarë të cilët ne i kemi çuar emrat si qytetarë në nevojë”, tha ministrja Gjermeni.
 
Buxheti përshin edhe një shumë të caktuar për përmirësimin e jetesës së komunitetit rome. Një tjetër pikë e parashikuar është edhe legalizimi i 50 mije objekteve të cilat kanë filluar këtë praktikë.

Redaksia Online
(e.s/shqiptarja.com)