Buxheti 2020/ Civici: Rritja ekonomike deri në 4% e vështirë...vetëm nëse mblidhen shumë ndihma nga tërmeti (VIDEO)

TIRANË- Vetëm pak ditë pas miratimit të buxhetit për vitin 2020 në Kuvend me 90 vota pro, eksperti i ekonomisë Adrian Civici e shikon me skepticizëm nivelin e rritjes ekonomike të parashikuar për vitin e ardhshëm. Sipas tij, e vetmja mënyrë që rritja ekonomike të arrijë në 4% është nga mbledhja e sa më shumë të ardhurave nga ndihmat dhe donacionet.

“Nëse ka një faktor që mund ta realizojë rritjen ekonomike 4%, do të jenë të gjithë ndihmat të gjitha donacionet dhe financimet që do të bëhen për eliminimin e pasojave të tërmetit. Natyrisht këtu duhet të bëjmë një dallim midis rritjes ekonomike si shifër që mund të jetë 4%, dhe efekteve që ajo ka në eliminimin e varfërisë në shpërndarjen e mirëqenies që vjen nga rritja ekonomike” tha Civici.

Civici shprehet për Report TV se duhet bërë një rishpërndarje më e mirë e fondeve tek qytetarët, dhe në rast të rritjes ekonomike të jenë ata që përfitojnë të parët.

“Në vetvete sa më tepër bën shpenzime, natyrisht që rritja ekonomike shtohet, por kur këto shpenzime nuk kthehen  më pas në mirëqenie ose nuk shpërndahen qoftë nga pikëpamja territoriale ose nga pikëpamja sociale të shtresave të ndryshme në mënyrë më harmonike dhe të barabartë, natyrisht efektet e rritjes ekonomike nuk janë ato që priten” u shpreh eksperti i ekonomisë.

Ndërkohë sa i takon faturës së dëmeve të tërmetit të 26 nëntorit, ai sqaron se është i pranueshëm  një borxh i ri i përkohshëm për të kapërcyer situatën.

“Situata e pranon si zgjidhje edhe një borxh të ri të përkohshëm, natyrisht me kushtin që të përdoret vetëm në ekonomi dhe në eliminimin e pasojave të tërmetit dhe jo të shërbejë si një valvul për të rregulluar shpenzimet korente apo elemente të tjera” deklaron Civici.

Në buxhetin e vitit 2020, për programin e rindërtimit janë përcaktuar 20 miliardë lekë, ku 13 miliardë janë nga buxheti i shtetit dhe 7 miliardë nga donacionet. Po ashtu 1 miliard lekë është parashikuar të përdoren si bonus qiraje për familjet që do të  akomodohen në apartamente me qira.

B.K./Shqiptarja.com

TAG:
• buxheti 2020
• ardian civici