NEW YORK – Lotët e të vesë. “Profecia” e zëdhënëses. Paralajmërimi i dhënë një gazetareje. Dobësitë në siguri në hotelin më të blinduar të Uashingtonit. Buzëqeshja e kreut të Pentagonit. Në Amerikën e komploteve, njerëzit vdesin dhe mbijetojnë, dhe historia përsëritet edhe tani, vetëm pak orë pas atentatit në galanë e korrespondentëve të Shtëpisë së Bardhë. Prej javësh, baza Maga kishte ngritur dyshime për atë që i ndodhi Donald Trump në Butler, Pensilvani, në vitin 2024, dhe që rezultoi vendimtar për fitoren e tij. Por tani konspiracionistët kanë shtuar një mister të ri: atentatin e së shtunës në mbrëmje. Sipas tyre, ishte një inskenim. Këtë e thonë edhe në Tehran. Agjencia e lajmeve Tasnim thekson se sulmi “ngjalli dyshime dhe shumë pikëpyetje që në minutat e para”. “Mos vallë Trump dëshiron ta shfrytëzojë në prag të zgjedhjeve të ardhshme të mesmandatit në SHBA, apo synon ta përdorë kundër Iranit apo një vendi tjetër?”, shkruan ajo, duke nënvizuar se presidenti kishte publikuar menjëherë pas sulmit një postim ku thoshte se do të kthehej në gala për të vazhduar darkën, një version “mondan” i atij “Fight, Fight, Fight” – thirrja për të luftuar – që e kishte kthyer në ikonë pas atentatit të vitit 2024.

Tre orë pas atentatit, në rrjetet sociale u bë viral një video në stil Lego, e krijuar nga iranianët, ku ironizohej sulmi dhe hidhej dyshimi se gjithçka ishte e planifikuar: Trump paraqitet me kapelen Maga dhe i rrethuar me pelena. Dihet se në orën 20:36 një kalifornian 31-vjeçar, Cole Tomas Allen, inxhinier mekanik, kaloi me vrap nëpër hollin e hotelit Hilton Washington për të arritur në sallën e madhe ku po zhvillohej gala e korrespondentëve, ku ishin të pranishëm presidenti i SHBA-së dhe Zonja e Parë, zëvendëspresidenti dhe anëtarë të tjerë të administratës. U qëlluan gjashtë herë. Allen plagosi një agjent të Secret Service, përpara se të neutralizohej, të zhvishej, por të mos vritej. Pikërisht kjo ka ndezur dyshimet e para mes amerikanëve: në rrjetet sociale pyesin pse dhjetëra agjentë në detyrë në hotel nuk e qëlluan, ndonëse ishte i armatosur me pushkë, pistoletë dhe thika. “Ishte pjesë e marrëveshjes për të ngritur këtë skenar?”, shkruajnë online. Si arriti Allen, pyesin ata, të afrohej vetëm pak metra nga salla, duke kaluar në një korridor ku ndodheshin të paktën njëzet agjentë sigurie? Pamjet nga kamerat e brendshme tregojnë atentatorin duke vrapuar i armatosur dhe duke përfituar nga një moment kur agjentët duken më të relaksuar. Në platformën X, “The Maga Report” pretendon se autori kishte në profil simbolin e Forcave të Mbrojtjes së Izraelit, përpara se llogaria të fshihej. Skenat kaotike pas alarmit shtojnë dyshime të reja, si lotët e Erika Kirk, e veja e aktivistit të djathtë Charlie Kirk, i vrarë në një atentat në shtator, e konsideruar nga vetë Maga si një “aktore”, e cila del nga hoteli dhe sapo mbërrin para kamerave thotë “dua vetëm të shkoj në shtëpi”, duke qarë në mënyrë teatrale. Në mesnatë, në SHBA, fjala më e përdorur në X ishte tashmë “staged” – “e inskenuar”.

Bëhet virale edhe një foto ku një burrë i afrohet çiftit presidencial, u pëshpërit diçka dhe u tregon një letër – dhe për rrjetin kjo duket si një udhëzim – pak çaste para shpërthimeve. Pastaj qarkullon videoja me “profecinë” e zëdhënëses së Shtëpisë së Bardhë, Karoline Leavitt, e cila në Fox kishte thënë duke buzëqeshur: “Fjala e sonte do të jetë tipike për Donald Trump. Do të ketë disa ‘shots’”. Por “shots fired” është edhe një shprehje që nënkupton “goditje verbale”.

Po ashtu edhe rrëfimi për lidhjen telefonike në Fox News të gazetares Aisah Hasnie, e cila ishte ulur në gala pranë bashkëshortit të zëdhënëses së Shtëpisë së Bardhë, Nicholas Riccio. “Ishte një nga të ftuarit tanë – tregon ajo – ishte ulur pranë meje. Pikërisht kur darka po niste dhe u luajt himni kombëtar, ai u përkul drejt meje dhe më tha seriozisht: ‘Të kam parë në televizion, bën një punë të shkëlqyer, por duhet të jesh shumë e kujdesshme’. U pa përreth dhe më tha: ‘Ka disa…’”. Por në atë moment lidhja ndërpritet. Pastaj edhe fotoja e bërë nga Reuters pas skenave, ku kreu i Pentagonit, Pete Hegseth, shfaqet duke buzëqeshur në mënyrë të papërshtatshme pas atentatit. Dhe reagimi i Dana White, shefi i arteve marciale mikse dhe mik i Trump, i cili u tha gazetarëve duke dalë nga hoteli: “Ishte jashtëzakonisht e çmendur, e shijova çdo minutë, një përvojë e çmendur dhe unike”. Mbesa e Trump, Mary L. Trump, shkruan në X: “E çuditshme që Donald nuk u ngrit, nuk ngriti grushtin dhe nuk tha ‘Fight, Fight, Fight’, si në Butler”.

Në fund vijnë fjalët e presidentit në mesazhin e tij nga Shtëpia e Bardhë. Nuk janë të mbushura me zemërim, por të përmbajtura, duke bërë thirrje për unitet. Dhe më pas thotë: “Po të kishim tashmë sallën e madhe këtu, do ta kishim zhvilluar galanë”. Në të njëjtat minuta, në X dhjetëra llogari – mes tyre edhe shumë trollë – rikthejnë kërkesën për ndërtimin e një salle të tillë, siç kishte kërkuar presidenti. Por ka edhe nga ata që shkojnë më tej, si llogaria TaraBull, që hedh një pistë të re: “Tani e kuptoni pse nuk duan që Trump të ndërtojë një sallë baloje”, duke sugjeruar një komplot global kundër tij. Dhe me kalimin e orëve, situata nuk pritet të qetësohet. Priten zbulime të reja, hipoteza dhe dyshime./ La Repubblica