Celibashi: Reformë parlamentare
PD atë që nuk na e dha ne

TIRANE - Socialistët do t’i rikthehen çështjes së reformës parlamentare, duke miratuar kërkesat që iu mohuan kur ata vetë ishin në opozitë. Në “Ora News” ministri për Marrëdhëniet për Parlamentin, Ilirjan Celibashi, deklaron se mazhoranca e majtë do të mbyllë të gjitha ndryshimet  në rregulloren e parlamentit, për të garantuar një veprimtari kuvendore në përputhje me Kushtetutën.

Çka do të thotë se socialistët do garantojnë votimin e dekreteve të presidentit në mënyrë të fshehtë dhe kohë të barabartë diskutimi të liderit të opozitës me kryeministrin në seancë plenare, pika për të cilat, legjislaturën e kaluar grupi i punës për reformën parlamentare nuk ra dakord, pavarëisht 4 muajve punë. Ish kreu i KQZ, tashmë me kostumin e anëtarit të ekzekutivit të ri, deklaron se misioni i parë që lidhet me KQZ është rikthimi në legjitimitet i këtij institucioni, e për këtë duhet një marrëveshje politike.

Celibashi tha se ministrat e kabinetit të ri qeveritar, janë ende duke punuar dhe hartuar projektin e dikastereve që ata do të drejtojnë, por e sigurt është se e majta do garantojë një qeverisje ndryshe nga ajo e 8 viteve që lamë pas.

Shkrimi u botua sot në gazetën Shqiptarja.com (print) 21.08.2013
 
Redaksia Online
(b.m/shqiptarja.com)

TAG:
• kqz