Çelja e negociatave, ish-ministrja: Vendimi në parim nuk do të thotë fillim i menjëhershëm i kapitujve. Duhen plotësuar 15 kushte

Ish-ministrja e Integrimit, Klajda Gjosha, në një reagim referuar çeljes së negociatave të Shqipërisë nga BE, është shprehur se ky hap në parim nuk do të thotë fillim i menjëhershëm i kapitujve, pasi sipas saj duhet të plotësohen 15 kushte.

“Vendimi i sotëm i Këshillit Europian për të mbështetur Shqipërinë dhe Maqedoninë e Veriut, rikonfirmon edhe një herë perspektivën europiane të vendeve tona.
Celja e negociatave në parim nuk do të thotë fillim i menjëhershëm i kapitujve. Vendet anëtare kanë ndjekur një strategji ndryshe për t’i bërë vendet tona më të përgjegjshme për detyrimet dhe plotësimin e plot 15 kushteve, para konferencës së parë ndërqeveritare, e cila ende mbetet pezull dhe pa afat kohor.
Ky është një vendim për të inkurajuar qytetarët dhe për të vendosur në punë qeverinë dhe politikën.
Ndonëse në kohë të vështira si ky i Covid-19, perspektiva jonë europiane mbetet gjithnjë një prioritet i patjetërsueshëm!”, shkruan Gjosha.

Lajmi kryesor:

Vendimi i shumëpritur në një moment të vështirë! BE çel negociatat me Shqipërinë dhe Maqedoninë e Veriut

TAG:
• BE
• shqiperi
• negociatat
• Klajda Gjosha