Champions League/ 'Hakmerret' Atletico Madridi, fiton 0-2 kundër Barcelonës në aktin e parë! PSG likuidon 2-0 Liverpoolin (GOLAT)

Fitorja 0-2 e Atletico Madridit përballë Barcelonës në ndeshjen e parë çerekfinale të Champions League është shënjuar nga penalltia e munguar në favor të vendasve pas prekjes me dorë nga Marc Pubill.

Gjyqtari rumun Istvan Kovacs, 22 lojtarët në fushë, zëvendësuesit dhe stafi i trajnerëve, 59,299 spektatorët në stadium dhe miliona shikues në shtëpi panë mbrojtësin e Atleticos, Marc Pubill, duke e prekur topin me dorë brenda zonës së penalltisë pas një pasimi nga portieri i tij Musso. Megjithatë, gjyqtari rumun nuk e konsideroi atë si penallti dhe as VAR nuk e njoftoi atë për gabimin e hapur. Musso e kishte nisur lojën, por Pubill e ndali sferën me dorë brenda zonës në shenjë keqkuptimi.

“Në VAR ishte një gjerman, faleminderit Gjermani. Nuk mund të besoj çfarë ndodhi, Pubill preku topin me dorë. Duhej të merrte kartonin e dytë të verdhë dhe duhet që të kishim një penallti në favorin tonë”, tha Flick, trajneri i Barcelonës.

Trajneri i Liverpoolit, Arne Slot, foli pas humbjes së ekipit të tij 2-0 në Paris nga PSG në aktin e parë çerekfinal të Champions League. Holandezi beson se atmosfera e zjarrtë në 'Anfield' më 14 prill do bëjë që ekipi i tij të frymëzohet për përmbysjen e madhe kundër kampionëve në fuqi të këtij eventi.

"Ndoshta duhet t’i referohem sezonit të kaluar, asaj që më jep ndjesinë më të mirë dhe duhet t’i referohem historisë së këtij klubi, sa ndikim mund të ketë Anfield për një performancë.

PSG-ja ishte padyshim skuadra më e mirë në fushë, mund të kishte shënuar më shumë se dy gola. Por gjëja e mirë ishte se lojtarët e Liverpool treguan shpirt luftarak dhe vazhduan të luftojnë”, tha Slot.

Trajneri holandez, më pas komentoi edhe ndeshjen si dhe cilësitë e PSG-së.

“Pothuajse çdo herë që ata kishin një gjuajtje, kishim shumë lojtarë pas topit ose duke mbrojtur zonën tonë. Kjo ishte e nevojshme sepse nëse nuk kthehesh mbrapsht, këta lojtarë, si ata të City, janë në gjendje të të dëmtojnë shumë.

Në ndeshjen e kthimit duhet të kemi një performancë më të mirë dhe patjetër që kemi nevojë që tifozët tanë të na ndihmojnë. Duhet të krijojmë një atmosferë ku mund të ngrihemi në një nivel më të mirë sesa arritëm në Paris”, tha Slot mes të tjerash.

Gennaro Gattuso nuk është më trajner i Italisë, por polemikat pas humbjes kundër Bosnje Hercegovinës nuk kanë mbaruar ende. Pas performancës së shkëlqyer të Matteo Ruggerit në Champions League kundër Barçës, disa tifozë të Italisë në rrjetet sociale pyetën veten pse mbrojtësi i majtë i Atletico Madridit nuk u thirr as për ndeshjet eliminatore të Kupës së Botës.

Interneti nuk e ka falur trajnerin kalabrez për atë që ata e quajnë një vendim "të çmendur"; ndërsa Ruggeri po tregonte performanca të shkëlqyera kundër Yamal, Italia kishte dështuar tashmë në Bosnje, duke mos pasur asnjë opsion taktik të zbatueshëm.

Në 'Parkun e Princave' kampionët në fuqi të Champions, PSG, fituan 2-0 kundër Liverpoolit. Miqtë nga Anglia vijojnë të jenë në krizë, ndërsa fundjavën e shkuar u eliminuan edhe nga FA Cup. Desire Doue në minutën e 11 i dha epërisë të besuarve të Luis Enriques, ndërsa Khvicha Kvaratskhelia gjeti golin e dytë në minutën e 65-të. Më 14 prill në 'Anfield' Liverpooli do kërkojë përmbysjen në aktin e dytë, një rezultat që duket më shumë se i vështirë duke parë formën e djemve të Arne Slot.