Qeveria e re e Greqisë do të vazhdojë të mbështetet në aleancën e SYRIZA me Grekët e Pavarur. Pas fitores së SYRIZA  mediat greke bëjnë me dije se Aleksis Cipras do t’i besojë sërish aleatit të djathtë Panos Kamenos për të bërë qeverinë e re.

Duke qenë se SYRIZA ka fituar 145 deputetë, ndërsa Grekët e Pavarur 10, atëherë me 155 deputetët këto dy parti mund të qeverisin pa problem, sepse në parlamentin prej 300 vendesh ata kanë shumicën e mjaftueshme për t’i dhënë votbesimin qeverisë së re së drejtuar nga Cipras.

Po sipas mediave greke sot pasdite pritet një takim midis Cipras e Kamenos për të konfiguruar qeverinë e re. Nuk pritet të ketë ndryshime sasiore në ndarjen e posteve qeveritare midis dy partive, por vetëm disa ndryshime figurash. Nuk dihet ende nëse Panos Kamenos do të rimbajë postin e ministrit të Mbrojtjes apo do të kërkojë ndonjë ministri tjetër.
 
Vendet në Parlamentin e ri
SΥRΙΖΑ:                          35,5%    - 145 deputetë
Demokracia e Re :            28,1%  - 75 deputetë
Agimi i Artë:                      7,1%  - 19 deputetë
PASOK:                            6,4%  - 17 deputetë
ΚΚΕ:                                 5,5%  - 15 deputetë
Potami:                              4%      - 10 deputetë
Grekët e Pavarur:               3,7%   -10 deputetë
Bashkimi i Qendrës:           3,4%  - 10 deputetë  

Redaksia online
(S.m/shqiptarja,com)