Covid 19 shmang dënimet me burg, Olsian Çela jep udhëzimet: Jepni masa alternative

Prokurori i Përgjithshëm, Olsian Çela ka urdhëruar të gjithë prokurorët, drejtuesit  e prokurorive dhe oficerët e policisë gjyqësore në lidhje me masat e reja të marra për parandalimin e përhapjes së koronaviursit. Çela përveç masave të marra për të mbrojtur personat që ndodhen në burg nga Covid 19, gjithashtu me kërkesë të Ministres së Drejtësisë, Etilda Gjonaj, prokurori i përgjithshëm kërkon që në zbatim të kushteve ligjore të shmangen masat me burg për personat që janë në pritje të dënimit apo edhe dënimeve në të ardhmen.

Olsian Çela shprehet se në  vlerësim të gjendjes, problematikës dhe nevojave të marrjes së masave procedurale në lidhje me ushtrimin e ndjekjes penale në njësitë administrative që mbulon prokuroria që ai/ajo drejton, si dhe në zbatim të kompetencave të parashikuara në ligj vendosin marrjen e masave procedurale për bërjen kujdes sipas fazave të procedimit penal, siç mund të jenë:

1. Në fazën e hetimeve paraprake, vlerësimin e kërkesave për caktimin e masave të sigurimit personal, në zbatim të kushteve dhe kritereve ligjore që garantojnë sigurinë e nevojshme personale të personit të arrestuar në flagrancë apo ndaluar ose të personit nën hetim, dhe parandalimin e përhapjes së coronavirusit të ri.

2. Në fazën e diskutimeve përfundimtare në gjykimet e themelit vlerësimin, nëse plotësohen kushtet dhe kriteret ligjore për të kërkuar caktimin e dënimeve alternative të dënimit me burgim dhe parandalimin e përhapjes së coronavirusit të ri.

3. Në fazën e ekzekutimit të vendimeve penale të formës së prerë, vlerësimin, nëse plotësohen kushtet dhe kriteret ligjor për të kërkuar shtyrjen e ekzekutimit të vendimit të dënimit me burgim dhe parandalimin e përhapjes së coronavirusit të ri; nëse plotësohen kushtet dhe kriteret ligjore për vuajtjen e dënimit të mbetur me qëndrim në shtëpi dhe parandalimin e përhapjes së coronavirusit të ri.

TAG:
• Olsian Çela
• koronavirusi ne shqiperi