Dalin përgjime të reja të Mimoza Kusarit! Përfaqësuesi i Listës serbe fton shefen e deputeteve të Albin Kurtit në hotel të Radojiçiçit në Kopaonik

Katër biseda të Mimoza Kusari-Lilës me Sllavko Simiçin, zbulojnë përpjekjet e shefes së Grupit Parlamentar të Lëvizjes Vetëvendosje për koordinim me Listën Serbe. Bisedat në WhatsApp dëshmojnë “kapitullimin” e LVV-së para Listës Serbe për kalimin e ligjeve në kuvend dhe për çështjen e energjisë elektrike në veri. Kusari-Lila e quan vëlla Simiqin. Të dy merren vesh për caktimin e një takimi të Simiqit me kryeministrin Kurti. Kusari-Lila pranon ftesë për vizitë te Radoiçiçi në Kopaonik.

Mimoza Kusari-Lila po përpiqej të krijonte aleancë me Listën Serbe për çështje të agjendës legjislative të mazhorancës.

Për këtë qëllim, shefja e Grupit Parlamentar të Lëvizjes Vetëvendosje kishte krijuar raporte miqësore me ish-shefin e Grupit Parlamentar të Listës Serbe, Sllavko Simiç, me të cilin komunikonte përmes platformës WhatsApp. Ajo, përpiqej t’i bashkërendonte veprimet me Listën Serbe për miratimin e ligjeve të rëndësishme në kuvend.

Në katër biseda të realizuara përmes WhatsApp-it, të cilat i ka siguruar Paparaci, Kusari-Lila dhe Simiç bisedonin edhe për vizitat e deputetëve të Listës Serbe te Millan Radoiçiçi në Kopaonik.

Këto biseda dhe të tjera janë në duart e Policisë së Kosovës.

Në bisedën e parë Kusari-Lila – Simiç, të realizuar më 29 janar të vitit 2022, Kusari-Lila pranon një përshëndetje nga Kopaoniku dhe një ftesë që pretendohej se i vinte nga Millan Radoiçiçi për vizitë në resortin turistik ku qëndronte ai, përtej kufirit me Kosovën.

“Ja një përshëndetje nga Kopaoniku [qesh]”, i shkruan Simiq, Kusari-Lilës duke i propozuar asaj që shkonte për vizitë në Kopaonik, ku Radoiçiç zotëron një hotel në të cilin qëndronte asokohe. “Pra, të jemi shëndosh dhe ti vjen këtu në mal”.

Kusari-Lila, e cila kishte krijuar raporte gati miqësore me Simiçin, aty për aty nuk e refuzon ftesën.

“Shefja e Grupit Parlamentar të VV-së në Kopaonik [qesh]”, i përgjigjet ajo ftesës së Simiçit, tregon biseda e parë mes tyre.

“E pse jo?”, ia kthen Simiçi.

Nga ftesa për vizitën në Kopaonik, ata kalojnë direkt në temë. Bisedojnë për çështjen e energjisë elektrike në veri. Kusari-Lila e pyet ish-shefin e Grupit Parlamentar të Listës Serbe për kohën se “kur do të gjejmë zgjidhje për rrymën në veri”.

Të dy bien në ujdi që të gjejnë një zgjidhje për këtë çështje.

“Kur gjejmë zgjidhje për rrymën në veri [qesh]”, i shkruan Kusari-Lila, Simiçit.

Simiç, ia kthen pozitivisht.

“Bën”, i përgjigjet Simiçi. “Mbaje në mend çfarë ke thënë”.

“Çfarë kam thënë?!”, pyet me habi Kusari-Lila.

“Aaaaa të vij ta bëjmë zgjidhjen për rrymë”, përgjigjet sërish Simiç.

“Po natyrisht”, pohon ajo.

“U morëm vesh”, e mbyll bisedën Simiç.

Në një bisedë tjetër, Kusari-Lila dhe Simiq flasin për shqyrtimet e disa ligjeve në një seancë plenare të Kuvendit të Kosovës.

Biseda, e zhvilluar më 8 shkurt të vitit 2022, dëshmon urgjencën e Kusari-Lilës për koordinim me Listën Serbe.

Shefja e deputetëve të LVV-së interesohet nëse deputetët e Listës Serbe do të shkonin në seancën që do të mbahej të nesërmen.

Simiq ia konfirmon vendimin e partisë për të mos marrë pjesë në seancë. I arsyetohet me shpjegimin se 12 deputetët e Listës Serbe ishin infektuar me koronavirus gjatë një vizite te Radoiçiçi në Kopaonik.

“Përshëndetje Sllavko, a do të vini nesër në seancën e Kuvendit?”, interesohet Kusari-Lila për vendimin e Grupit Parlamentar të Listës Serbe. “Vazhdimi është nesër në orën 11:00”.

“Përshëndetje, Ishim te ai shoku në Kopaonik, për ta vizituar, ai është me koronë, dhe të gjithëve na infektoi me koronë, të gjithë 12 deputetëve”, ia kthen Simiçi, Kusari-Lilës.

Kusari-Lila e kupton se Radoiçiç, kryetari faktik i Listës Serbe, nuk po i lejonte deputetët të merrnin pjesë në seancë. Por, ajo insiston të informohet nëse dy deputetët e komuniteteve të tjera, Adem Hodza e Fadil Gashi, do të shkonin në seancë.

“Si bre 12 deputetë përsëri me koronë”, përgjigjet me habi ajo. “A e keni marrë Bajramin dhe Ademin me veti? Më fal, Fadilin dhe Bajramin?”.

Simiç ia kthen: “Të gjithë për Zotin [qesh]”.

Në bisedën e tretë mes tyre, të dy merren vesh që të caktojnë një takim për Simiqin me kryeministrin Albin Kurti.

Simiç, i cili planifikonte të shkonte në takim në katër sy me Kurtin, e njoftonte Kusari-Lilën përmes mesazheve në WhatsApp se “kishte marrë dritën e gjelbër” për takim me kryeministrin.

Kusari-Lila ia konfirmonte se do të angazhohej që takimi të ndodhte. Më vonë, e njoftonte Simiqin për orën e takimit.

“Kolege, kam marrë dritën e gjelbër që të shihem me Kryeministrin dhe të bisedojmë. Nëse bën nesër, për mua është OK”, e informon Simiçi, Kusari-Lilën.

“Super, do të të lajmëroj për kohën e saktë”, i përgjigjet Kusari-Lila.

Pak kohë më vonë, gjatë asaj bisede, Kusari-Lila ia konfirmon Simiqit terminin e takimit me kryeministrin.

“Në orën 11:00 nesër te Kryeministri”, pohon ajo.

Në bisedën e katërt dhe të fundit mes tyre, dëshmohet se sa të afërta dhe miqësore ishte komunikimi mes Kusari-Lilës dhe Simiçit.

Kusari-Lila, e quan “vëlla” Simiqin, në një bisedë në maj të vitit 2022, në të cilin të dy diskutojnë për Projektligjin për Pagën Minimale.

Në këtë bisedë, të zhvilluar në maj të vitit 2022, rreth një muaj para se Projektligji i cili do t’i përjashtonte veteranët nga paga minimale do të votohej në lexim të parë Ligji për Pagën Minimale, Kusari-Lila dhe Simiq negocionin për seancën kur do të hidhej në shqyrtim ky projektligj.

“A do të jeni nesër në seancë? Duhet të bisedojmë. E kemi shqyrtimin e jashtëzakonshëm të buxhetit për 2022 dhe projekt-propozimin për pagën minimale”, i kallëzonte Kusari-Lila, Simiçit për punimet e kuvendit.

“Kur?”, e pyeste Simiçi.

“Po nesër vëlla”, i përgjigjej ajo, ish-shefit të Grupit Parlamentar të Listës Serbe dhe i lutej atij ta informonte paraprakisht.

“Rreth orës 10:00 Vazhdimi i seancës. Të lutem bisedo dhe më lajmëro”, i shkruante Kusari-Lila, Simiçi.

Biseda e parë

Sllavko Simiç: Ja një përshëndetje nga Kopaoniku (qesh)

Sllavko Simiç: Pra, të jemi shëndosh, dhe ti të vjen këtu në mal

Mimoza Kusari-Lila: Shefja e grupit parlamentar të VV-së në Kopaonik (qesh)

Sllavko Simiç: E pse jo

Mimoza Kusari-Lila: Më herët kam shkuar në Mavrovë

(E pse jo)

Mimoza Kusari-Lila: Kur gjejmë zgjidhje për rrymën në Veri (qesh)

Sllavko Simiç: Bën, Mbaj mend çfarë ke thënë

Mimoza Kusari-Lila: Çfarë kam thënë?!

Mimoza Kusari-Lila: Aaaaa të vij ta bëjmë zgjidhjen për rrymë

Mimi: Po natyrisht

Sllavko Simiq: Po

Sllavko Simiç: U morëm vesh

Biseda e dytë

Mimoza Kusari-Lila: Hajde jam në zyre

(8. shkurt 2022)

Mimoza Kusari-Lila: Përshëndetje Sllavko, a do të vini nesër në seancën e Kuvendit?

Mimoza Kusari-Lila: Vazhdimi është nesër në orën 11:00

Sllavko Simiq: Përshëndetje, Ishim te ai shoku në Kopaonik, për ta vizituar, ai është me koronë, dhe të gjithëve na infektoi me koronë, të gjithë 12 deputetë

Mimoza Kusari-Lila: (habitet) Si bre 12 deputetë përsëri me koronë

Mimoza Kusari-Lila: A e keni marrë Bajramin dhe Ademin me veti ?

Mimoza Kusari-Lila: Më fal, Fadilin dhe Bajramin?

Sllavko Simiq: Të gjithë për Zotin (qesh)

Mimoza Kusari-Lila: Atëherë, shpresoj që do ta kaloni lehtë këtë virus

(nuk u realizua thirrja në orën 12:47)        

Biseda e tretë

(18 prill 2022)

Mimoza Kusari-Lila: Eja te unë në zyre

Sllavko Simiq: Hajde, vetëm të kryej diçka dhe po vij

Sllavko Simiq: A bën?

Mimoza Kusari-Lila: Bën

(nuk u realizua thirrja në orën 15:08)

Sllavko Simiq: Kolege, Kam marrë dritën e gjelbër që të shihem me Kryeministrin dhe të bisedojmë. Nëse bën nesër, për mua është OK.

Mimoza Kusari-Lila: Super, do të të lajmëroj për kohën e saktë.

Sllavko Simiq: Në rregull

Mimoza Kusari-Lila: Në orën 11:00 nesër te Kryeministri

Sllavko Simiq: Në rregull

Biseda e katërt

Mimoza Kusari-Lila: Përshëndetje Sllavko,

Sllavko Simiq; Përshëndetje

Mimoza Kusari-Lila: Gëzuar festën, vetëm edhe të kisha ditë se cila festë është sot

Mimoza Kusari-Lila: A do të jeni nesër në seancë?

Mimoza Kusari-Lila: Duhet të bisedojmë

Mimoza Kusari-Lila: E kemi shqyrtimin e jashtëzakonshëm të buxhetit për 2022

Mimoza Kusari-Lila: Dhe projekt-propozimin për Pagën minimale

Sllavko Simiq: Kur

Mimoza Kusari-Lila: Dmth ajo që do të dyfishohet

(Sllavko Simiq: Kur)

Mimoza Kusari-Lila: Po nesër vëlla

Mimoza Kusari-Lila: Rreth orës 10:00

Mimoza Kusari-Lila Vazhdimi i seancës

Mimoza Kusari-Lila: Të lutem bisedo dhe më lajmëro

Sllavko Simiq: OK të lajmëroj./ Reporteri.net

Xh.K/Shqiptarja.com

TAG:
• kosove
• mimoza kusari