Debati për taksën në Berlin/ Pacolli jep versionin e tij: Ja cfarë u diskutua mes Ramës dhe Haradinajt

Zv.kryeministri i Kosovës, Behgjet Pacolli ka dhënë versionin e tij për atë që është diskutuar në Berlin në lidhje me kërkesën e Serbisë për heqjen e taksës nga Prishtina zyrtare.  E ndërsa kryeministri Rama mohoi deklaratën e Haradinajt, se i kishte bërë presion për heqjen e taksës për mallrat serbe, Pacolli tha se Rama ka ndërhyrë duke thënë se “dialogu me Serbinë mund të shkojë përpara nëse hiqet taksa”.

“Edhe kryeministri në fjalimet e veta është parë pak a shumë një distancim sa i përket taksës sepse ka ndërhyrë edhe kryeministri i Shqipërisë, i cili e pohoi se dialogu mund të shkojë përpara, se taksa duhet të hiqet, edhe pse nuk ka thënë drejtpërdrejt se taksa duhet hequr. Ka qenë një atmosferë e tillë, Haradinaj ka pikëpamjet e veta” – tha Pacolli.

Pas deklaratave të Haradinajt, Rama reagoi duke thënë se në Samitin e Berlinit askush nuk i ka bërë presion që të heqë taksën teksa zbuloi edhe një propozim që i është bërë homologut të tij kosovar (lexo këtu). Por, Haradinaj tha sot se do ta tregojë të vërtetën edhe kur nuk i pëlqen dikujt dhe lidhur me këtë "është dikush me tregu të vërtetën", duke nënkuptuar prezencën e personave të tjerë prezentë të cilët mund ta konfirmojnë deklaratën e tij.

TAG:
• samiti i berlinit