Dëshmitë rrëqethëse të familjarëve të pengjeve izraelitë: Ato janë foshnje, ka pak gjak në rrobat e tyre! Na ndihmoni të marrim fëmijët tanë

Lot, vuajtje, pamje dhe rrëfime rrënqethëse nga Izraeli, ku një numër i madh të rinjsh, gra, vajza dhe djem janë rrëmbyer e masakruar në Gaza nga terroristët e Hamasit. Mbrëmjen e djeshme, anëtarët e familjeve të izraelitëve që janë marrë peng nga militantët e Hamasit, mbajtën një konferencë shtypi ku shprehën shqetësimin për rastet e rënda.

Mes tyre është edhe rrëfimi i Yoni Asher, i cili ka treguar momentin e tmerrshmëm të rrëmbimit të gruas dhe vajzës së tij nga persona të armatosur. 

“Dy vajzat e mia të vogla, ato janë ende bebe. Ata janë pesë dhe tre vjeç”, tha Yoni Asher. 

LEXO EDHE:
Presidenti i Argjentinës vizitë në Izrael në shenjë solidariteti

Një baba tjetër, Uri David, tha për mediat se kishte kaluar 30 minuta në telefon me dy vajzat e tij, Tair dhe Odaya, përpara se linja e telefonit të ndërpritej, raporton The Guardian.

“Dëgjova të shtëna, të bërtiturat në arabisht, u thashë të shtriheshin në tokë dhe të kapeshin për dore. Unë kërkoj që e gjithë bota të shohë se çfarë po kalojmë. Ne duhet t’i sjellim fëmijët në shtëpi dhe sa më shpejt që të jetë e mundur“, tha David.

Rreth 100 izraelitë, ushtarakë dhe civilë, besohet se mbahen peng në Gaza pas sulmit të befasishëm nga grupi militant Hamas mbi komunitetet në jug të Izraelit.

Një grup i dytë militant palestinez, Xhihadi Islamik, tha se po mbante gjithashtu më shumë se 30 pengje. Një zëdhënës i Forcave të Mbrojtjes të Izraelit (IDF) ka thënë se është e paprecedentë në historinë izraelite që kemi kaq shumë shtetas në duart e një organizate terroriste” Për shumë familje, lajmi se të dashurit e tyre ishin marrë peng u njoftua përmes videove të filmuara nga Hamasi dhe më pas të shpërndara në rrjetet sociale dhe përmes grupeve në WhatsApp.

Ishte një video e dy vajzave të saj të ulura në një dyshek në robëri që paralajmëroi Mayyan Zin për zhdukjen e tyre. Më pas ajo gjeti video të tjera në internet të personave të armatosur që hynin në shtëpinë e ish-bashkëshortit të saj, ndërsa vajzat e saj të tmerruara qanin pas tij.

Anëtarët e familjes së Nitzan Eli Akin, Noam, 48, Dikla, 51 vjeç dhe Ella, u morën peng gjithashtu nga i njëjti komunitet. Kontakti i tij i fundit me ta ishte në orën 10:30 të së shtunës, kur ata dërguan mesazhe duke thënë se militantët ishin afër.

“Ka pak gjak në rrobat e tyre, por ata duken në gjendje të mirë shëndetësore. Thjeshtë po lutemi që dikush të na ndihmojë t'i kthejmë të sigurt", tha ai.

Dyshohet se janë marrë peng edhe disa shtetas të huaj. Qeveria e Meksikës njoftoi se dy shtetas - një burrë dhe një grua - dyshohet se ishin marrë. Të paktën tre shtetas brazilianë janë gjithashtu të zhdukur, sipas zyrtarëve brazilianë. Një numër i panjohur amerikanësh janë gjithashtu në mesin e pengjeve, tha të dielën ambasadori izraelit në SHBA.

IDF ka thënë se Izraeli do të veprojë për të liruar pengjet, por analistët kanë paralajmëruar se përpjekjet për të shpëtuar të gjithë ata që Hamasi tha se tani po mbahen në vende të ndryshme mund të rrezikojë jetën e tyre.

“Realiteti mizor është se Hamasi mori pengje si një politikë sigurimi kundër veprimeve hakmarrëse izraelite, veçanërisht një sulmi masiv tokësor”, tha Aaron David Miller, një bashkëpunëtor i lartë në Carnegie Endowment for International Peace.

Familjet e të zhdukurve i janë lutur qeverisë së Izraelit dhe komunitetit ndërkombëtar që të shikojnë përtej politikës.

“Nuk ka të bëjë me politikën, është me të vërtetë për njerëzimin. Fëmijët janë atje, ju lutemi ndihmoni ata dhe na i ktheni”, tha Malki Shmetov, djali i të cilit është zhdukur.

S.S/G.MO/Shqiptarja.com

TAG:
• sulmohet izraeli