Dëshmitë/ Vlora nën ujë, banorët me lot në sy rrëfejnë përmbytjet për Report Tv: Uji si vullkan, na shkatërroi gjithçka! S'iu përgjigjën thirrjeve për ndihmë

Përmbytjet në Vlorë kanë shkaktuar dëme të mëdha edhe në shtëpitë e banorëve, të cilët thonë se natën e kanë kaluar jashtë ose duke u përpjekur të pastrojnë banesat. Ekipi i Report Tv që ndodhet në Vlorë sjell dëshmi të qytetarëve, të cilët me dhimbje të madhe përshkruajnë panoramën që ka lënë pas përmbytjet duke shkatërruar gjithçka që u doli para.

Në këto pamje që banorët tregojnë përmes Report Tv, gjithçka në banesat e tyre është nën ujë, ose me baltën që ka lënë pas përmbytje që vërshoi në banesat e tyre si një lumë i rrëmbyeshëm. Mobiljet janë shkatërruar, ushqimet janë prishur, e shpresat për banorët janë drejt Bashkisë për dëmshpërblim.

Një grua e përshkruan ujin që vërshoi në dritaret dhe dyert e shtëpisë si një vullkan. E shokuar, ajo thotë se nuk u mbeti asgjë, vetëm fëmijët i shpëtuan.

“Nga dritaret na erdhi uji, nga dera, nga banja, kemi marrë pllaka i kemi vënë lart mbi banjo. Si vullkan, ishte e pamundur, thamë shyqyr të na shpëtojnë fëmijët gjallë. Na është dëmtuar gjithë mobilja, s’kemi asgjë fare, mbajmë duart përpjetë. Uji ishte tamam si det. U bëmë ujë, dimë që notuam”, tregon një banore.

Të gjitha banesat e kateve të para në lagjen “11 Janari” në Vlorë , në zonën e njohur si “ Pusi i Mezinit” janë nën pushtetin e ujit e të baltës. Kemi kaluar një natë ferri thonë për mikrofonin e Report Tv banorët teksa tregojnë orët e tmerrit gjatë përballjes me vërshimin e ujit. Gjithçka ndodhi krejt papritur tregojnë banorët , teksa thirrjes së tyre për ndihmë nuk i është përgjigjur askush.

Vinte që lart, ishte rrëke e madhe, nuk mund ta përballoje dot. U mbush ballkoni, tualeti, të gjitha. Gjitha mobiljet janë shkatërruar, edhe dyshekët i kam nxjerrë jashtë. Nuk na e hapi njeri telefonin, kam një numër të bashkisë, nuk kishim as korent të vinim pak popmën të thithnim ujë.

“Oriz, makarona, çfarë kisha, të tërë kanë ikur poshtë. Nuk do çfarë të them. Që andej, që këtej, nuk dihej nga vinte uji. Ka ndodhur edhe një vit, por jo kështu. Të bëjë televizori. Kërkuar ndihmë? Ku të kërkosh, internet nuk kishe, me laraskat, me ç’të kërkojë. Natën e kaluam jashtë. Kam fjetur në këtë shtëpinë time, aq sa ke fjetur ti.

Ne jemi pensionistë, kam edhe një motër të sëmurë. Rroba nuk kemi. Kishim dy pako makarona aty, ikën. Gjithçka në pushtetin e ujit. Tërë natën pa gjumë, s’po e mbarojmë ujin akoma. Ku do kërkoje ndihmë, as drita, asgjë. Është hera e dytë që përmbytemi, herën e parë na tha Bashkia do ju ndihmojmë, asgjë. Mospastrimi i kanaleve. Na kanë lënë pa bukë fare.

Djali mbeti brenda, jemi ngritur gjithë fisi e pastruam.

Rreth orës, tham se zuri shi si gjithmonë. Jemi mbytur brenda, notonte frigoriferi i mbushur plot mbi ujë. Të gjitha plaçkat, asgjë s’ka ngelur. Vetëm dy televizorë kanë shpëtuar. Kërkova ndihmë dhe radhën e parë, na erdhi komisioni me gjithë kryetarin, na dhanë ndonjë copë pulle që do na vlerësonin plaçkën. Kjo është plaçkë e dytë që ka ikur, s’na e dhanë shpërblimin”, thonë banorët.

Kjo është hera e dytë që përmbytemi thonë banorët e dëmtuar, por si këtë herë nuk ka ndodhur kurrë më parë. Për këtë situatë ata fajësojnë bashkinë për mospastrimin e kanaleve kulluese, të cilat prej dy vitesh janë të tejmbushur me mbeturina.

Të shkatërruar ekonomikisht dhe të braktisur në fatin e tyre, banorët e kësaj lagjeje nuk fshehin zhgënjimin për qeverinë e votuar prej tyre.

Autoritetet vendore pritet të nisin punën për të bërë një bilanc të dëmeve të shkaktuar në gjithë Vlorën për shkak të përmbytjeve, që goditën qytetin bregdetar më 4 tetor si asnjëherë më parë.

Raportuan për Report Tv dhe Shqiptarja.com, gazetarët Armand Xhelili dhe Sokol Dema

 

 

Rendit zhvillimet sipas orarit:

Të Fundit Të Parat

SI.E./I.M/Shqiptarja.com

TAG:
• permbytje
• Vlore
• moti i keq
• permbytjet ne vlore