Kapiteni i Uellsit dhe ish-ylli i Arsenalit, Aaron Ramsey, i ka dhënë fund karrierës në futbollin profesionist. Klubi i fundit i 35-vjeçarit ishte UNAM Pumas në Meksikë, nga i cili u largua në tetor 2025. Më parë, ai përfaqësoi edhe klube si Juventus, Rangers, Nice dhe Cardiff City.

“Ky nuk ka qenë një vendim i lehtë për t’u marrë. Pas shumë mendimesh, kam vendosur të tërhiqem nga futbolli", tha Ramsey në një deklaratë zyrtare në faqen e internetit të Federatës së Futbollit të Uellsit.

Ai tërhiqet si njëri prej lojtarëve më të mëdhenj të Uellsit. Ramsey ka shënuar 21 gola në 86 paraqitje me kombëtaren, ndërsa përfaqësoi vendin në tri ngjarje të mëdha.

Mesfushori e nisi karrierën te Cardiff City, para se të kalonte në vitin 2008 tek Arsenali. Me klubin londinez ai fitoi tre FA Cup, ndërsa shënoi golat e fitores në dy finale. Ai qëndroi për 11 vite tek Arsenali.

Në vitin 2019 Ramsey u bashkua me Juventusin si lojtar i lirë, por dështoi të tregonte gjithë cilësitë e tij edhe për shkak të lëndimeve.

"Së pari, dua të filloj me Uellsin. Ka qenë privilegji im të vesh fanellën e Uellsit dhe të përjetoj kaq shumë momente të pabesueshme me të. Nuk do të kishte qenë e mundur pa kontributin e jashtëzakonshëm të të gjithë trajnerëve nën drejtimin e të cilëve kam luajtur dhe të gjithë stafit që më ka ndihmuar në shumë mënyra.

Së dyti, faleminderit të gjitha klubeve për të cilat kam pasur fatin të luaj. Faleminderit të gjithë trajnerëve dhe stafit që më kanë ndihmuar të jetoj ëndrrën time dhe të luaj në nivelin më të lartë.

Dhe një falenderim i madh për gruan dhe fëmijët e mi dhe të gjithë familjen time. Pa ju në krah gjatë gjithë kohës, asgjë nga kjo nuk do të kishte qenë e mundur”, është shprehur Ramsey.