Letra e shefit të policisë zbulon pse "dhuna në Rrugën e Kombit" u transferua në Tiranë

Vendimi gjyqësor i djeshëm i Gjykatës së Kukësit, në një seancë të zhvilluar në Tiranë, që solli lënien në burg të 11 personave, lirimin e 10 të tjerëve (detyrim paraqitje), si dhe masën e arrestit shtëpiak për dy persona, lidhur me shkatërrimin e pikave të kalimit në Kalimash, në rrugën Durrës Kukës, ishte disi i pazkaontë për kushtet në të cilat u zhvillua.

Gjykata qe e rrethuar jashtë dhe e mbushur me prani policore brenda saj. 23 protestuesit e arrestuar në Kukës u transportuan dhe u gjykuan në Tiranë, pas kërkesës së Gjykatës së Kukësit për një gjë të tillë.

Tani rezulton se një gjë e tillë ndodhi pasi policia e Kukësit nuk mund të garantonte zhvillimin e procesit në mënyrë të qetë.

Sipas një shkrese të shefit të komisariatit Kukës, Vasil Çela që i drejtonte gjykatës së rrethit Kukës, thuhet se: “…duke qenë se personat e ndaluar janë banorë të rrethit të Kukësit, mund të ketë reagim nga familjarët e tyre që mbështeten masivisht nga pushteti vendor (Këshilli Bashkiak) e disa parti politike. Organizata të Shoqërisë Civile dhe tubues të datës 31 mars 2018. Kjo mund të sjellë bllokim të rrugëve, destabilizim, ndoshta dhe dhunë të re, por tani në institucionet e qytetit Kukës”.

Policia e Tiranës ka proceduar pesë persona për protestën e djeshme përpara Gjykatës kur u dha masa e arrestit për protestuesit e Rrugës së Kombit.  Y.Sh., 34 vjeç, S.P., 21 vjeç, A.Z., 28 vjeç, G.Gj., 30 vjeç dhe M.N., 30 vjeç janë shoqëruar fillimisht në komisariat dhe më pas janë lënë të lirë.

Shërbimet e Policisë të Komisariatit nr. 2 i shoqëruan për disa minuta shtetasit e mësipërm në ambjentet e këtij Komisariati dhe i proceduan në gjendje të lirë për veprën penale "Tubim i paligjshëm", "Pengim i qarkullimit të mjeteve të transportit" dhe "Prishje të rendit dhe qetësisë publike".

Letra e shefit të komisariatit Kukës drejtuar Gjykatës së rrethit

TAG:
• protesta ne rrugen e kombit
• gjykata tirane