Digjet “Enver Hoxha” i Fevziut
pas Kosovës, dje në Elbasan

Një libër quhet i suksesshëm, të paktën kohët e fundit, nëse pëlqehet shumë ose nëse urrehet shumë. Të dyja rastet përkthehen në fitime më të mëdha për autorin. Dihet që krijimi i polemikave është një reklamë shumë e mirë për botuesin. Polemika ka krijuar edhe libri i fundit i Blendi Fevziut, “Enver Hoxha”, biografia e paautorizuar e diktatorit shqiptar.

Gjatë ditës së diel një grup mbështetësish të Partisë Komuniste kanë djegur disa kopje të librit “Enver Hoxha”. Të mbledhur në qendër te Elbasanit ata kanë protestuar duke e cilësuar librin nje fyerje ndaj figurës së Enver Hoxhës dhe ndaj historisë së luftës Antifashiste.

Në fund të vitit të shkuar e njëjta gjë ndodhi edhe në Ferizaj, ku Frontit Popullor për Kultivimin e Figurës së Enver Hoxhës” dogji disa kopje të librit të fundit të Fevziut.

“Enver Hoxha” i Fevziut
Libri “Enver Hoxha” tenton të tregojë përmes dokumenteve dhe dëshmive të periudhës sesi ish- udhëheqësi komunist i shqiptarëve arriti të konsolidojë dhe të ndërtojë pushtetin e tij. Autori u ka kushtuar një rëndësi të veçantë dokumenteve, ku përmes tyre del qartë raporti i Hoxhës me kundërshtarët dhe sesi arriti t’i eliminonte një nga një. Figura e Enver Hoxhës në biografinë e parë të tij bazuar mbi dokumentet e arkivit personal sipas Blendi Fevziut, është ajo e një tirani të pashembullt, një prej fatkeqësive më të mëdha të këtij vendi, por padyshim një njeri me një talent të spikatur politik, edhe pse një talent kriminal. Në këtë libër është përfshirë edhe ditari personal i Enver Hoxhës, që ndodhet në Arkivin Qendror të Shtetit. Një ditar, që sipas autorit Blendi Fevziu ka rreth 7000 faqe. ah/Shqiptarja.com/