Dramë, VAR, kartona të kuq dhe një ndeshje që u mbyll me largimin e dy portierëve para kohe. Milani fitoi 0-1 ndaj Genoas në udhëtim, kjo për raundin e tetë në Serie A. Kuqezinjtë e Piolit sigurojnë kështu fitoren e katërt radhazi dhe marrin kreun e renditjes, duke përfituar nga barazimi 2-2 i Interit kundër Bolognas. Ndeshja zgjati për më shumë se 100 minuta, me fundin që ishte dramatik.

Fillimisht Milani shënoi me Pulisic në minutën e 87-të, me VAR që e cilësoi golin të rregullt edhe pse vendasit pretenduan prekje të topit me dorë nga sulmuesi amerikan. Pas golit të pësuar, Genoa shtyu para dhe detyroi Maignan të ndërhynte keq kundër Ekuban, duke bërë që arbitri pas konsultës me VAR të ndëshkonte me karton të kuq portierin kuqezi.

Në portë për Milanin u fut sulmuesi Giroud, kjo pasi Pioli kishte bërë pesë zëvendësime. Në goditjen e dënimit, Genoa goditi shtyllën, ndërsa më pas Giroud grushtoi një rast. Edhe portieri i vendasve, Martinez doli me karton të kuq.

Në fund tri pikë për Milanin, që e sheh veten në krye të renditjes së Serie A me 21 pikë, dy më shumë se Interi. Sfida e radhës për kuqezinjtë është kundër Juventusit, teksa nuk do kenë Theon dhe Maignan për shkak të kartonave.

S.Dh/Shqiptarja.com
  • Sondazhi i ditës: 31 Mars, 11:25

    A besoni se Drejtori i ri Policisë, Hita do luftojë krimin dhe korrupsionin?

Lajme të tjera