Dritëro Agolli përplas analistët
Dritan Hila kundër Andrea Stefanit

Vlerësimi që Dritëro Agolli i ka bërë figurës së ish-Kryeministrit, Sali Berisha si mjek në një intervistë për mediat ka ngjallur debat dhe përplasje midis analistëve.
 
Gjithçka nisi nga një intervistë e Dritëro Agollit ku ai vlerësonte figurën e Sali Berishës si mjek dhe nuk ia falte faktin se ish-kryeministri e la shëndetësinë në këtë gjendje.
 
Menjëherë pas publikimit të intervistës së Agollit reagoi analisti Andrea Stefani, i cili tha se të gjitha ato që deklaroi Agolli janë ilustrim i një sëmundje të neveritshme që ka infektuar gjerësisht dhe elitisht në këto 25 vjet shoqërinë shqiptare.
 
Ndërsa sot, ka qenë  Dritan Hila, i cili nëpërmjet një postimi në faqen e tij në facebook, shkruan se akuzat e Stefanit ndaj Agollit janë shembulli më i mirë se si injoranca i sulet monumenteve me gurë.

"Ne keta 25 vjet ju kemi lene pasardhesve një hiç trashegimi kulturore. Bën perjashtim gazetaria ku do ju leme Andrea Stefanin. Eshte ai qe sulmoi Dritero Agollin pse ky nuk i bashkohet korit te lehjeve ditore te politikes. Eshte shembulli me ekselent si injoranca ju sulet monumenteve me gure. Se Driteroi qe te jete i madh u dashka te plotesoje kriterin e vetem te Stefanit, qe eshte sharja e Berishes. O pika qe s'te bie. Keta nuk te lene as te vdesesh i qete" -shkruan Dritan Hila në Facebook
 
I menjëhershëm ka qenë edhe reagimi i Andrea Stefanit po në Facebook. Ai i përgjigjet nëpërmjet një status të gjatë analistit dhe ish-zv/ministrit të mbrojtjes Dritan Hila. Ai shkruan se kritikat e tij i ka mirëkuptuar edhe Dritëro Agolli, nëdërsa Hila jo sepse sipas Stefanit ka një dashuri aq të madhe për monumentet.

"Vetë shkrimtari i madh ma mirëkuptoi kritikën. Por Dritani i vogël jo. Sepse paska një dashuri aq të madhe për monumentet, sa nuk përmbahet dot para një sakrilegji të tillë sikundër qënka kritika e një “monumenti”, - shkruan Stefani

Stefani shkruan se Dritani kërcënon të mos preken “idhujt me krena”, ndërsa reagimi i Dritanit sipas tij është fiks në një gjatësi vale jo vetëm me reagimet e fanatikëve të Berishës sa herë i gjuaj “me gurë monumentit” të idhullit të tyre “me krena”, por edhe me sharjet që më lëshuan pikërisht sapo kritikova Agollin lidhur me vlerësimin për Berishën.

"HILETE E DRITAN HILES
Dritani sapo me ka share në facebook. Do më kish pëlqyer të më kish kritikuar dhe jo sharë. Sepse kjo më detyron të bëj analizën e sharjes duke zbuluar hiletë e saj. Pra, Dritani më ka sharë për një kritikë që i bëra para pak ditësh shkrimtarit të shquar Ditero Agolli në lidhje me një vlerësim për Sali Berishën si politikan. Vetë shkrimtari i madh ma mirëkuptoi kritikën. Por Dritani i vogël jo. Sepse paska një dashuri aq të madhe për monumentet, sa nuk përmbahet dot para një sakrilegji të tillë sikundër qënka kritika e një “monumenti”. Në fakt, shtiret kinse i vjen keq për Dritëroin. Kjo është hileja e parë tij. Sepse në të vërtetë, nuk mbron Dritëroin (që s’ka nevojë ta mbrojë Dritani) por Berishën.

Kritikën time, Dritani, e quan injoracë që gjuan me gurë një monument si Dritëroi. Një tjetër hile kjo që kalon nëpër disa faza. Së pari, njeriun e gjallë e shndërron në monument. Së dyti, kritikën e shndërron në gur. Së treti, nga ngatërrimi me hile i këtyre premisave, arrin në konkluzionin hileqar se është gjuajtur me gur një monument! Në fakt, po kritikohej një njeri, që sado i madh, edhe mund të gabojë. Sepse të gabosh është njerëzore, “errare humanum est”.
Volteri ka thënë: e urrej pikëpamjen tënde por do ta mbroj me jetën time të drejtën që ke për ta shprehur atë. Vetë poeti i madh u ngrit në lartësinë e këtij volterizmi kur pas kritikës u shpreh: Eshtë liria e gazetarit! Por sipas Dritanit, që e mban veten për një lloj gazetari, paska ca raste qe kritika qënka mëkat. Madje, akoma më keq, një krim që "s’të lë të vdesësh". Por nuk është fare kështu. Kritika dhe cinizmi janë gjëra krejt të kundërta. Dhe po të kish prirjen për tu thelluar pak edhe Dritani do kuptonte se kritika ime për shkrimtarin e madh, nuk kërkonte poshtërimin e “monumentit” por mos zhyerjen e tij. Por, e përsëris, meraku për “monumentin”, është thjesht një hile, një lojë.

Problem i madh me disa njerëz qe hilet i shtyjne pa shpëtim drejt shtrembërimit të gjërave. Sepse nuk e kam kritikuar Agollin, sikundër me hile shkruan Dritani, pse nuk kritikon Berishën (gjë që në fakt Dritëroi e ka bërë ca kohë më pare, madje më fort se unë) por pse, në kontekstin e asaj interviste, e lëvdonte, në mendimin tim jo me meritë, atë. Shtrembëron, prapë me hile si dhe duke përvetësuar një akuzë që kanë vite që ma bëjnë fanatikët e Berishës, kur thotë se shaj Berishën. Në fakt, vetëm e kritikoj. Por berishistëve i duken kritikat si sharje nga dashuria fanatike që kanë për Berishën si për një monument. Dhe dashuria e fanatikëve për liderin mund të jetë veçse “monumentale”, e paluajtëshme, si ajo e Dritanit. Edhe ata mendojnë si Dritani që paska njerëz (në rastin e tyre Berisha) që është injorancë t’i kritikosh se kanë gjithmonë të drejtë. Si Duçja për shembull.

Ky është gjymtimi i fanatikëve dhe idhujtarëve të çdo ngjyre. Migjeni fliste për “idhuj pa krena”. Dritani kërcënon të mos preken “idhujt me krena”. Reagimi i Dritanit është fiks në një gjatësi vale jo vetëm me reagimet e fanatikeve të Berishes sa herë i gjuaj “me gure” “monumentit” te idhullit te tyre “me krena”, por edhe me sharjet që më lëshuan pikërisht sapo kritikova Agollin lidhur me vlerësimin për Berishën. Kam përshtypjen se nuk e ka nga që është fanatik i Dritëroit. Shtiret kinse i tillë. Dyshoj se kjo harmoni me berishistët i ka rrënjët në disa zhvillime të kohëve të fundit. Ndoshta me faktin se Dritani nuk është më zëvendësministër. Prandaj, më gjuan me gurë. Por objektivi është tjetërkund. Në kampin përballë Berishës. Gjithsesi i vjen më për mbarë të gjuaj me gurë një gazetar. Por sharja është si guri. Madje më e keqe. Siç thotë njê shprehje e vjetër: Gjuha eshtra ska po eshtra thyen. Dritani mendon se ka të drejtë të më gjuajë me gurë. Mesa duket nga që nuk jam një monument. Dritani respektoka vetëm monumentet. Se përsa i përket lirisë së kritikës, veti kjo e të gjallëve, shihet se nuk ka ndonjë rëndësi për Dritanin. Dhe nuk ka si të ketë. Ngase hileja nuk lyp të drejtë. Pra, as edhe liri. Sepse drejtësia dhe liria janë anë të së njëjtës medalje", - shkruan Stefani në Facebook.
 
Redaksia Online
(o.b/ Shqiptarja.com)