Dumani tha s’do rikandidojë/ Beqiri: Presion për zgjatjen e mandatit të prokurorëve! Kara: Ka mbështetjen e SHBA! Vokshi: SPAK u krijua me ultimatum të Amerikës

Kreu i SPAK, Altin Dumani, në raportimin e tij për veprimtarinë e SPAK gjatë 2024 në Komisionin e Ligjeve deklaroi se në përfundim të mandatit të tij në vitin 2028, ai nuk do të rikandojë më për të qenë pjesë e SPAK-ut.

Lidhur me këtë u diskutua edhe mbrëmjen e sotme në emisionin ‘Repolitix’, në Report Tv, ku avokati Idajet Beqiri, tha se deklarata e Dumanit ishte presion në mënyrë që të zgjatet mandati për 11 prokurorët e tjerë.

Ai tha se zgjatjen e mandatit të prokurorëve e ka në dorë Amerika, jo Kuvendi. Sipas avokatit, duhet që të ketë zgjatje të mandatit të prokurorëve.

‘Kjo është strukturë e posaçme, pra ka një fillim dhe një mbarim, kësaj strukture iu dhanë edhe objektivat për çfarë krijohet dhe kur u krijua në 2016 ligjvënësi pa që në këtë vend kishte krim të organizuar që po gërryente shtetin dhe institucionin e tij dhe kishte një korrupsion të lartë shtetëror. Ky ishte koncepti i asaj strukture. Mandati s’mund ti ndërpritet prokurorëve, sepse në duar të tyre janë dosje. Dumani e ka bërë kërkesën për zgjatjen e mandatit të prokurorëve, por atë se di Kuvendi, atë e di Amerika dhe ata të BE që të thonë jepi edhe një mandat sepse s’mund t’i lërë çështjet përgjysmë.

Sepse s’mund ti marrë një prokuror i ri sepse sa të njihet me dosjen ai, është e vështirë. Do të shtyhet mandati. Dumani bënë presion dhe presioni më i mirë është kur jep shembull personal vet. Ai thotë është e domosdoshme që të bëhet zgjatja e mandatit dhe nëse e vlerësoni se e bëjë se kam interes vetë, unë vetë nuk do të rikandidojë por bëjeni për interesin e luftës kundër korrupsionit. Ai ka bërë një punë të mirë dhe sot vlerësohet nga ndërkombëtarët dhe nga të gjithë’, tha ai.

Juristi Romeo Kara, tha se Dumani ka mbështetjen e SHBA, gjë e cila u tregua edhe nga vizita që ai bëri në SHBA muajin e kaluar.

‘Po ne s’do vdesim se ikën Dumani. Unë kam edhe kritika për ata. Të nisin hetime kryesisht, të mos pres kallëzime dhe të fillojnë të bëjnë me verifikimin e pasurive të bëjnë vetingun e të gjithë politikanëve. Ai është në luftë me establishmentin politikë dhe kjo është e qartë. Këta duan që të hapin të kaluarën dhe nëse s’ka ndëshkime ne nuk kemi riparime. I gjithë establishmenti vazhdon, as krimi i organizuar dhe as korrupsioni nuk janë disiplinuar. Dumani nuk është i fortë në deklarata por është i fortë në punë. Në SHBA e thirrën në mënyrë publike Dumanin, para pak kohësh, kjo tregon se ai është i atyre’, tha ai.

Edhe për avokatin Rezart Kthupi, kreu i SPAK thirrjen për zgjatjen e mandatit të prokurorëve nuk e bëri për veten, por për 11 prokurorët e tjerë të cilëve u mbaron mandati brenda një viti.

‘Ai tha se nuk do që të jetë më në SPAK dhe kërkesa bëhet specifikisht për prokurorët e tjerë të SPAK. Po që Dumani do të jetë aty edhe 3 vite të tjera kjo është pak por e sigurt. Ai thotë unë s’po e bëjë kërkesën për zgjatjen e mandatit se më përfundon mua mandati, sepse unë s’do të vazhdojë si  prokuror edhe sikur ju të jepni mundësi që mandati të rinovohet, por për 10 kolegët e tjerë duhet që të vlerësoni zgjatjen e mandatit’, tha ai.

Ekspert i së Drejtës Penale, Indrit Vokshi, tha se SPAK u krijua me ultimatum të SHBA. Sipas tij, ishte Amerika ka bërë presion te politika shqiptare për krijimin e këtij institucioni të drejtësisë.

‘S’ka qenë vullneti i politikës për ta ngritur SPAK, por ka qenë një ultimatum i SHBA. Nëse s’do të ishte ai presion nuk do të bëhej kjo gjykatë asnjëherë. Ka qenë ish-Sekretari i Shtetit i Shteteve të Bashkuar   John Kerry kur deklaroi se duhet të bëhet votimi i reformës në drejtësi dhe i bëri thirrje politikë shqiptare që të miratojë reformën në drejtësi. Sepse të ishte për këta, këta s’do ta kishin miratuar kurrë’, tha ai.

Rendit zhvillimet sipas orarit:

Të Fundit Të Parat