E lindi në burg, pas 40-viteve kërkon të bijën! ’Pa Gjurmë’ shfaq imazhin e Migenës! A është ajo vajza që kërkojmë?

Zbuloi sekretin e jetës në emisionin “Pa gjurmë”, për të kërkuar të bijën, që e lindi pas hekurave të burgut, Dashurie Begaj përballet për herë të parë me atë, që dyshohet se mund të jetë vajza Migena Begaj, që solli në jetë më 19 shkurt të vitit 1980. Stafi ’Pa gjurmë’ u kontaktua nga një kushëri i një vajze me të njëjtin emër, duke na pohuar se u birësua nga halla e tij, të dhënat e së cilës përkonin me faktet, që nëna solli në studio.

Stafi u lidh me Migena Manajn, birësuar në Laç dhe që sot jeton në Greqi, e cila dyshohet të jetë pikërisht ajo që kërkohet në ‘Pa Gjurmë. Dashuria mbërriti enkas nga Italia për të komunikuar live, me 40-vjeçaren, e cila në një lidhje telefonike pranon ngjashmërinë që ka me zonjën në studio. Ajo thotë se ka mbajtur të njëjtin emër me të cilin ka qenë e regjistruar nga nëna biologjike dhe se ka lindur në po të njëjtin vit, me vajzën që kërkohet.

"Jam marrë nga spitali, sepse isha shtruar për shkak të anemisë. Më kanë dorëzuar në spital nga persona me funksione politike. Këtë gjë e kam dëgjuar nga biseda e nënës me tezen. Kam mësuar se dikush në vitin 1990 më kërkoi. Nuk e di nëse ka qene nëna ime apo jo. Me këtë emer më gjetën dhe këtë emër më lanë. Mamaja më ka thënë që nuk është e sigurt data e lindjes, viti është 1980. Më kanë dorëzuar disa persona të policisë në atë kohë", tha Migena nga Greqia.

Me një zemër të vrarë, jo vetëm nga pesha e brengës, por edhe nga ndërhyrjet e bëra, Dashuria nuk gjen fjalë, kur ‘Pa Gjurmë’ shfaq për herë të parë, disa nga fotot e Migenës. Të dyja u treguan të gatshme që pas kësaj të bëjnë analizën e AND-së, ajo që do t’i jepte fund kërkimit të gjatë prej 40 vitesh.

Migena, vajza e birësuar: Them se kam ngjashmëri me këtë zonjë.

Dashuri Begaj: Nuk e di ç’të them. Një ngjashmëri!

Migena, vajza e birësuar: Di që është vonuar regjistrimi dhe nëna më ka thënë se nuk dihet saktësisht dita e lindjes.

Odeta Dume: Jeni të gatshme të bëni analizën e AND-së ?

Dashuri Begaj: Është një shans që do ta bëjmë. Ishalla është vajza ime. Nuk më tret dheu. Shpresoj të jetë vajza qe kërkoj.

Migena, vajza e birësuar: Shpresoj të jem unë ajo që ju kërkoni.

E burgosur dhe më pas e internuar, nëna nga Durrësi është në kërkim të vajzës që lindi 40 vite më parë. Dashurie Begaj jeton në Itali. Ajo mbërriti në studio për të rrëfyer një jetë në udhëkryq, që nga dita kur me martesën e të atit pas vdekjes së nënës, njerka e dëboi nga shtëpia.

Migena dhe Dashurie Begaj

/r.k./Shqiptarja.com

TAG:
• Pa Gjurme
• Dashurie Begaj
• e humbura