Rajoni i Lezhës është kthyer në një destinacion mjaft të pëlqyer për eksploruesit e natyrës. Teksa jemi në stinën e vjeshtës, numri i turisteve me rulota është mjaft i lartë sidomos në zonën e Kunes pranë plazhit dhe në Zadrimë.

Të ardhur nga vende të ndryshme të botës, turistet vlerësojnë bukuritë natyrore dhe kushtet e përshtatshme klimaterike për pushime në  çdo stinë.

"Unë jam nga Gjermania dhe po shëtisim prej më shumë se një muaj në të gjithë Ballkanin. Por Lezha na ka tërhequr shumë. Këtu ka det, lagune dhe mal dhe mbi të gjithë ushqime shumë të shijshme. Me pak fjalë po e kalojmë shumë, pasi dhe njerëzit janë shumë bujar dhe mirëpritës"- tha turisti.

"Unë vij për herë të parë në Shqipëri dhe po më pëlqen shumë. Lezhën ma kanë sugjeruar dhe erdha pa provoi dhe realisht po kalojmë shumë mire. Është një zonë me shumë atraksione të të gjitha llojeve dhe një mundësi shumë e mire eksplorimi që nuk e gjen në asnjë vend tjetër. Do qëndroj rreth 1 javë dhe do rikthehem sërish për pushime këtu sepse vërtet ja vlen"- vijoi ai.

"Pasi kemi shëtitur në disa vende, bashkë me një grup miqsh vendosem që të vijmë dhe këtu në Shqipëri. Lezhën na kanë sugjeruar dhe vendosem që të ndalojmë. Po e kalojmë shumë mire, sidomos ushqimet po na pëlqejnë shumë. Janë prefekt. Do ju sugjeroja çdo kujt që të vijë këtu sepse është një mrekulli. E dua shumë Shqipërinë". – tha ai.

Krahas bregdetit, Lezha është mjaft tërheqëse dhe për kulturën, historinë dhe gastronominë, duke ofruar në këtë mënyre turizëm gjithëvjetor, ndërsa numri i vizitoreve vendas dhe të huaj është gjithnjë në rritje.