TIRANE- Zyra Qendrore Kombëtare e Interpol Tirana ka kryer ekstradimin, nga Brukseli drejt vendit tonë, të shtetasit shqiptar Luan Sula.

Luan Bajram Sula, 35 vje[, nga Kruja, ishte i shpallur në kërkim ndërkombëtar pasi Gjykata e Rrethit Gjyqësor Durrës, më datë 25.02.2011 e kishte dënuar  me 5 vjet burgim, për kryerjen e veprës penale të “Trafikimit të mjeteve motorrike“

I ekstraduari Luan Sula, rreth 8 vite më parë, ka trafikuar nga Mbretëria e Bashkuar drejt vendit tonë, përmes Portit të Durrësit, një automjet të tipit “BMW 330 CL”, i sekuestruar fill më pas në Tiranë. Ky automjet ka rezultuar i raportuar, i vjedhur më datë 19.06.2006, në Londër, Mbretëri e Bashkuar.

Si rezultat i bashkëpunimit të Interpol Tirana me Interpol Brukselin, u bë i mundur pak kohë më parë dhe arrestimi i tij në Belgjikë, me qëllim ekstradimin drejt vendit tonë.

Ditën e sotme, në aeroportin “Nënë Tereza“, në Rinas, ky shtetas i është dorëzuar përfaqësuesve të Drejtorisë së Përgjithshme të Burgjeve.

Redaksia Online
(e.n/Shqiptarja.com)