Një muaj më parë i ekzekutuan vëllanë/ Shpërthim në shtëpinë e Talo Çelës, në oborr u gjet 2.8 kg tritol i paplasur! I shumëkërkuari e kontrollon nga arratia me kamera (VIDEO)

Në orët e para të mëngjesit të sotëm i është vënë tritol shtëpisë së Talo Çelës të shumëkërkuarit nga Elbasani i cili është në kërkim për grabitjen e Rinasit dhe për atentatin me armë zjarri të 2 vëllezërve  Haxhia në Durrës.

Tritoli ka shpërthyer në pjesën e jashtme të shtëpisë dhe ka vetëm dëme materiale, ndërkohë në oborr policia gjeti 2.8 kg lëndë plasë që nuk shpërtheu, e cila mund ta rrëzonte vilën 2-katëshe. Siç shihet edhe nga pamjet e Report Tv në shtëpi vihet re se ka dëme materiale në katin e parë të saj, ku xhamat janë bërë copë. Edhe pse në të nuk banonte njeri, shtëpia e të shumëkërkuarit të Elbasanit ka kamera sigurie, të cilat sipas burimeve të Report Tv i kontrollon vetëm Talo Çela nga arratia.

Nga ana tjetër në zonën ku ndodhet shtëpia nuk ka banesa të tjera afër dhe as kamera të cilat mund të kenë filmuar autorin. Ndërkat mësohet se shtëpia ndodhet 150 metra larg vendit ku u ekzekutua vëllai i Talos, Bujar Çela.

"Më datë 05.11.2020, rreth orës 04:45, në fshatin Katundi i Ri, Elbasan,  në pjesën e jashtme të banesës e cila është e pabanueshme  në pronësi  shtetasit T.Ç., 49 vjeç, ka shpërthyer një sasi  dyshohet  lëndë plasëse, ku si pasojë ka vetëm dëme materiale. Menjëherë në vendngjarje kanë shkuar forcat e Policisë dhe grupi hetimor ku vijon veprimet për sqarimin e rrethanave të ngjarjes, identifikimin dhe kapjen e autorit", thotë policia.

Ndërkaq kujtojmë se ka kaluar më shumë se një muaj, nga vrasja e Bujar Çelës, vëllait të Talo Çelës, e ndodhur rreth orës 05:45 të mëngjesit të 17 shtatorit, atëherë kur 62-vjeçari konsumonte kafenë e mëngjesit, për shkak se punonte taksist ku priste udhëtarë që vinin me autobusë nga Greqia. Makina e tij tip "Benz" me targa AA 020 UZ, që e përdorte si taksi ishte parkuar në hyrje të lokalit në Bradashesh, ku Cela po konsumonte kafenë në momentin që është ekzekutuar. Pista kryesore e hetimeve për vrasjen e Bujar Çelës është për shkak të përfshirjes kriminale të vëllait të tij, Talo Çela.

Çela  është autori i dyshuar i ngjarjes së datës 9 prill 2019, ndodhur në pistën e aeroportit “Nënë Tereza”, në Rinas, Tiranë, ku persona të maskuar, nën kërcënimin e armëve të zjarrit, kanë arritur të vjedhin një sasi të konsiderueshme vlerash monetare të cilat po ngarkoheshin në avion dhe më pas gjatë shkëmbimit të zjarrit me Policinë, mbeti i vrarë njëri prej autorëve kryesorë të kësaj ngjarjeje.

Gjithashtu ai dyshohet se fshihet pas atentatit me armë zjarri të 2 vëllezërit  Haxhia në Durrës.  Emri i Talo Çelës ka dalë në dritë përmes dëshmisë së të penduarit të drejtësisë, Klevis Alla, të arrestuar për vrasjen e vëllezërve Haxhia. 

Talo Çela dhe vëllai i tij Bujar Çela i ekzekutuar një muaj më parë

Rendit zhvillimet sipas orarit:

Të Fundit Të Parat

/r.k./Shqiptarja.com

TAG:
• tritol
• shtepi
• BUjar Çela
• tao cela