Emigrimi/ Tabaku për BBC: Shqiptarët largohen prej korrupsionit dhe krizës ekonomike! Qeveria t’a pranojë problemin dhe të gjejë një zgjidhje

Në një reportazh kushtuar emigrimit të shqiptarëve, BBC ka zhvilluar një intervistë me deputeten demokrate Jorida Tabaku e cila ka parashtruar sipas saj shkaqet që i çojnë shqiptarët për t’u larguar nga vendi i tyre.

“Ata besojnë se sistemi në vendin tonë nuk është i drejtë. Meritokracia nuk ekziston. Ata nuk kanë shanse ekonomike. Është  shumë e vështirë të kemi mobilitet social. Nëse ke lindur i varfër në Shqipëri mbetesh i tillë pavarësisht se sa shumë punon”, tha Tabaku.

Më tej ajo theksoi se një nga shkaqet kryesore të emigrimit është edhe korrupsioni që ka prodhuar një sërë problemesh të tjera si mungesën e oportuniteteve.

“Ne, si politikanë, duhet ta pranojmë se kjo është e lidhur me korrupsionin e madh dhe sidomos në veri të vendi është e lidhur me mungesën e oportuniteteve. Dhe kjo është diçka që i takon qeverisë ta adresojë.”

E pyetur më tej se kush janë shkaqet e tjera që detyrojnë shqiptarët të përdorin rrugët ilegale drejt Mbretërisë së Bashkuar, ajo theksoi se përtej mungesës së sundimit të ligjit, mos zbatimit të ligjit nga policia dhe rojet kufitare në vendin tonë një arsye është dhe vështirësitë që hasin qytetarët për të fituar të drejtën e punësimit në Mbretërinë e Bashkuar.

Tabaku thekso se qeveria duhet ta pranojë këtë si problem dhe më pas të shohë rrugën për ta zgjidhur. Nuk mund të flasim për zgjidhje të një problemi që qeveria nuk e njeh.

“Duhet të kemi një sistem brenda kornizave ligjore ashtu që këta persona mos të detyrohen të largohen në këtë mënyrë. Duhet të kemi një procedurë më të përshpejtuar më Mbretërinë e Bashkuar, siç fjala vjen kemi me vendet e BE-së”, u  shpreh Tabaku ndërsa theksoi se e kupton fare mirë se si ndjehen sot emigrantët shqiptarë që janë mirëintegruar në Britani duke kontribuar në jetën sociale të Mbretërisë së Bashkuar.

SI.E./Shqiptarja.com

TAG:
• emigrim
• debati per shqiptaret ne britani
• Jorida Tabaku